नौ महिनामा रु.१०.४९ अर्बको बीमा पोलिसी सरेण्डर, नवीकरण नभएका बीमालेख १२ लाख

काठमाण्डौ । चालु आवको तेस्रो त्रैमाससम्म जीवन बीमा क्षेत्रबाट पोलिसी सरेण्डरमार्फत १० अर्ब ४९ करोड ५७ लाख रुपैयाँ बाहिरिएको छ ।  

नेपाल बीमा प्राधिकरणका अनुसार चैत मसान्तसम्म कुल ६८ हजार ८५५ वटा पोलिसी सरेण्डर भएको छ । सरेण्डर भएको पोलिसी संख्या गत आवको सोही अवधिसम्मको तुलनामा १४.१३ प्रतिशत कम हो ।  

गत आवको तेस्रो त्रैमाससम्म ८० हजार १८७ वटा पोलिसी अर्थात् ११ अर्ब ९ करोड ७१ लाख रुपैयाँ बराबरको पोलिसी सरेण्डर भएको थियो ।  

जीवन बीमा कम्पनीहरुले सरेण्डरमार्फत बाहिरिदै गएको रकम घटाउन थालेको देखिन्छ । पोलिसी संख्या र रकम घटाउँदा जीवन बीमा क्षेत्रमा ६० करोड १४ लाख रुपैयाँ कायम भएको छ ।  

पछिल्लो समय जीवन बीमा कम्पनी र नियामक निकाय नेपाल बीमा प्राधिकरणले सरेण्डरदर घटाउन विभिन्न खालका सचेतनामूलक कार्यक्रमहरु आयोजना गर्दै आइरहेका छन् ।  

यता सरेण्डरदरको अवस्थामा क्रमिक सुधार देखिन थालेपनि जीवन बीमा कम्पनीहरुमा व्यतित हुने बीमालेख रकम भने बढेको देखिएको छ ।  

जीवन बीमा कम्पनीहरुमा बीमा पोलिसी नवीकरण नहुनु पनि मुख्य समस्याको रुपमा छ । तेस्रो त्रैमाससम्म ३७ अर्ब ७३्र करोड ४ लाख रुपैयाँ बराबरको पोलिसी नवीकरण हुन बाँकी छ । जुन यो रकम गत आवको तुलनामा २.३३ प्रतिशत बढी हो ।  

तर कम्पनीहरुले पोलिसी नवीकरण नभएको संख्या भने केही कम गरेका छन् । गत आवको तेस्रो त्रैमाससम्म कुल १२ लाख ४६ हजार ३०१ वटा पोलिसी नवीकरण हुन बाँकी थियो भने चालु आवको यस अवधिसम्म १२ लाख २५ हजार ४५४ वटा पोलिसी नवीकरण हुन बाँकी छ । यसर्थमा व्यतित भएका बीमालेखको संख्या गत आवको तुलनामा १.६७ प्रतिशतले घटेको छ ।