कोशी, बागमती र गण्डकीका पहाडी भू-भागमा वर्षा र हिमपातको पूर्वानुमान

काठमाण्डौं । जल तथा मौसम विज्ञान विभागअन्तर्गतको मौसम पूर्वानुमान महाशाखाले आगामी आइतबार र सोमबार देशका केही तराई क्षेत्रमा हावाहुरी चल्ने सम्भावना रहेको जनाएको छ ।  

विशेषगरी मधेश तथा कोशी प्रदेशका तराई भूभागमा मौसम अस्थिर रहने र केही स्थानमा तीव्र हावाहुरी चल्न सक्ने पूर्वानुमान गरिएको हो ।

महाशाखाका अनुसार हाल देशमा पश्चिमी वायु तथा स्थानीय वायुको प्रभाव कायम रहेको छ ।  

यी मौसमी प्रणाली सक्रिय रहेकाले देशका विभिन्न भू-भागमा बदली, वर्षा तथा हावाहुरीको अवस्था देखिएको हो ।  

अहिले गण्डकी, बागमती र कोशी प्रदेशका केही स्थानमा हल्कादेखि मध्यम वर्षा भइरहेको छ ।

आज शनिबार रातिको मौसम पूर्वानुमानअनुसार कोशी, बागमती र गण्डकी प्रदेशका हिमाली तथा पहाडी भू-भागका थोरै स्थानमा मेघगर्जन र चट्याङसहित मध्यमसम्मको वर्षा हुने सम्भावना रहेको छ ।

उच्च हिमाली क्षेत्रका केही स्थानमा हल्का हिमपात हुन सक्ने महाशाखाले जनाएको छ ।

महाशाखाका अनुसार आइतबार कोशी, बागमती, गण्डकी र कर्णाली प्रदेशका हिमाली तथा पहाडी भू-भागमा सामान्यदेखि पूर्ण बदली रहने सम्भावना रहेको छ ।  

ती क्षेत्रमा मौसम आंशिक रूपमा सक्रिय रहने भएकाले वर्षाको सम्भावना पनि कायम रहने जनाइएको छ ।

त्यसैगरी सोमबार पनि कोशी, बागमती र गण्डकी प्रदेशका हिमाली तथा पहाडी भू-भागमा सामान्य बदली रहने पूर्वानुमान गरिएको छ ।  

मौसम प्रणालीको प्रभावका कारण पहाडी क्षेत्रका केही स्थानमा हल्का वर्षा हुन सक्ने सम्भावना रहेको मौसमविद्हरूले बताएका छन् ।

महाशाखाले विशेषगरी आइतबार र सोमबार मधेश तथा कोशी प्रदेशका तराई क्षेत्रका केही स्थानमा हावाहुरी चल्न सक्ने चेतावनी दिएको छ ।  

हावाहुरीका कारण जनजीवन, कृषि, सडक यातायात तथा दैनिक गतिविधिमा आंशिक प्रभाव पर्न सक्ने भएकाले सतर्कता अपनाउन आग्रह गरिएको छ ।

यसैबीच सुदूरपश्चिम र लुम्बिनी प्रदेशमा तापक्रम बढ्ने सम्भावना रहेको महाशाखाले जनाएको छ ।  

ती प्रदेशका तराई तथा भित्री मधेश क्षेत्रमा गर्मीको महसुस बढ्न सक्ने भएकाले आवश्यक सावधानी अपनाउन सुझाव दिइएको छ ।

मौसमविद्हरूले मेघगर्जन, चट्याङ, हावाहुरी तथा वर्षाका कारण हुन सक्ने सम्भावित जोखिमबाट बच्न सुरक्षित स्थानमा बस्न, आवश्यक परे मात्र यात्रा गर्न तथा मौसमसम्बन्धी अद्यावधिक जानकारी नियमित रूपमा लिन आग्रह गरेका छन् ।