(3).gif)
(2).gif)
.png)
काठमाण्डू, पार्टीको ११औँ महाधिवेशनपछि थाँती रहेका संगठनात्मक निर्णयहरूलाई निष्कर्षमा पुर्याउने उद्देश्यसहित नेकपा एमालेको केन्द्रीय सचिवालय बैठक आज बस्ने भएको छ ।
अध्यक्ष केपी ओलीको निजी निवास भक्तपुरको गुण्डुमा दिउँसो १ बजे बैठक शुरु हुने बैठकमा महाधिवेशन सम्पन्न भएको लामो समय बितिसक्दा पनि पार्टीभित्र नेताहरूको जिम्मेवारी स्पष्ट रूपमा विभाजन हुन नसकेको अवस्थालाई अन्त्य गर्ने दबाबबीच सचिवालय बैठक निर्णायक मोडमा पुगेको बताइएको छ ।
(2).gif)
.gif)
संगठनात्मक संरचना प्रभावकारी बनाउने, निर्णय प्रक्रियालाई चुस्त बनाउने र पार्टी सञ्चालनलाई प्रणालीगत रूपमा अघि बढाउने विषयमा शीर्ष नेतृत्वबीच गहन छलफल हुने अपेक्षा गरिएको छ ।
एमाले स्रोतका अनुसार आजको बैठकको केन्द्रमा केन्द्रीय सदस्यहरूको कार्यविभाजन अन्तिम रूप दिनु रहेको छ ।
पार्टीले संगठनलाई तल्लो तहसम्म मजबुत बनाउने रणनीतिअन्तर्गत केन्द्रीय सदस्यहरूलाई प्रत्यक्ष रूपमा पालिका तहसम्म जिम्मेवारी दिने तयारी गरेको छ ।
त्यसअनुसार हरेक केन्द्रीय सदस्यलाई निश्चित पालिकाको इन्चार्ज तोकिने योजना अघि बढाइएको छ, जसले आगामी स्थानीय तह निर्वाचनलाई केन्द्रित गर्दै संगठन विस्तारलाई गति दिने विश्वास गरिएको छ ।
यस योजनामार्फत एमालेले वडा, पालिका र जिल्ला तहसम्म पार्टी संरचना सक्रिय बनाउने तथा जनस्तरसम्म प्रभावकारी सम्पर्क सञ्जाल विस्तार गर्ने लक्ष्य लिएको छ ।
स्थानीय तहमा संगठनको उपस्थिति मजबुत बनाउँदै कार्यकर्ता परिचालन, जनसम्पर्क विस्तार र राजनीतिक सन्देश प्रवाहलाई व्यवस्थित गर्ने रणनीति पार्टीले अपनाएको नेताहरूले बताएका छन् ।
बैठकमा केन्द्रीय विभाग, जनसंगठन तथा अन्य संगठनात्मक संरचनामा समेत जिम्मेवारी पुनर्वितरण गर्ने विषयले स्थान पाउने सम्भावना छ ।
लामो समयदेखि नेतृत्वविहीन रहेका वा कार्यवाहक आधारमा सञ्चालन भइरहेका विभागहरूलाई पूर्णता दिने तयारी गरिएको छ ।
संगठन विभाग, प्रचार विभाग, आर्थिक व्यवस्थापन तथा अन्य महत्वपूर्ण संरचनामा नयाँ जिम्मेवारी तोकिने वा पुनर्संरचना हुने संकेत गरिएको छ ।
(1).gif)
यसअघि जेठ २ गते तय गरिएको सचिवालय बैठक आवश्यक तयारी पूरा नभएको कारण स्थगित गरिएको थियो ।
त्यसपछि आजका लागि पुनः बैठक बोलाइएको हो ।
बैठकमा संगठनात्मक विषयसँगै समसामयिक राजनीतिक परिस्थिति, सरकार सञ्चालनको समीक्षा, पार्टीको आन्तरिक व्यवस्थापन तथा जनसरोकारका विषयहरूमा पनि छलफल हुने बताइएको छ ।
त्यसैगरी हालै सम्पन्न राष्ट्रियसभा निर्वाचन तथा अन्य राजनीतिक गतिविधिहरूको विस्तृत समीक्षा गर्दै आगामी रणनीति तय गर्ने विषय पनि बैठकको कार्यसूचीमा समेटिएको छ ।
पार्टीले चाँडै केन्द्रीय कमिटी बैठक बोलाउने तयारीसमेत गरेको छ, जसले सचिवालयले लिने निर्णयलाई थप संस्थागत गर्ने अपेक्षा गरिएको छ ।
यसका अतिरिक्त सरकारले हालै हटाएका सुकुमबासी बस्ती, अव्यवस्थित बसोबास व्यवस्थापन, भूमि समस्या तथा यसले जनतामा पारेको प्रभावबारे पनि विस्तृत समीक्षा हुने जनाइएको छ ।
सरकारका पछिल्ला निर्णयप्रति देखिएको जनस्तरको प्रतिक्रिया, आर्थिक अवस्था, सार्वजनिक सेवा प्रवाहको स्थिति तथा समग्र राजनीतिक वातावरणबारे समेत नेताहरूले आ–आफ्ना धारणा राख्ने तयारी गरेका छन् ।
एमाले स्रोतका अनुसार आजको बैठकले पार्टीको आगामी राजनीतिक तथा संगठनात्मक दिशालाई स्पष्ट रूप दिने अपेक्षा गरिएको छ ।
.gif)
.gif)
(1).gif)
(2).gif)
.png)
.jpg)
.jpeg)
.jpg)
