प्रतिनिधिसभामा पर्चा प्रदर्शनपछि सभामुखको कडा चेतावनी, सांसदहरूलाई संसदीय मर्यादा कायम राख्न निर्देशन

काठमाण्डौं । प्रतिनिधिसभामा सोमबारको बैठकका क्रममा सभामुख डोलप्रसाद अर्यालले सांसदहरूलाई संसदीय आचारसंहिता र मर्यादाभित्र रहेर आफ्नो भूमिका निर्वाह गर्न कडा निर्देशन दिएका छन् ।

बैठक सुरु भएलगत्तै श्रम संस्कृति पार्टीका सांसदहरूले सरकारविरुद्ध नारासहितका पर्चा देखाउँदै केही क्षण मौन प्रदर्शन गरेपछि सदनको वातावरण केही समय असहज बनेको थियो । 

त्यसपछि सभामुख अर्यालले हस्तक्षेप गर्दै यस्तो प्रकारका गतिविधि संसदको गरिमासँग मेल नखाने बताएका हुन् ।

सभामुखले संसदलाई लोकतान्त्रिक व्यवस्थाको प्रमुख कानुन निर्माण गर्ने संस्था भन्दै यसभित्र हुने बहस, असहमति र विरोध सबै व्यवस्थित र अनुशासित ढङ्गले हुनुपर्नेमा जोड दिए ।  

उनका अनुसार विरोध व्यक्त गर्ने अधिकार भए पनि त्यसको स्वरूप र शैली संसदीय मूल्यभित्र सीमित हुनुपर्छ ।

बैठक सञ्चालनका क्रममा सभामुख अर्यालले सांसदहरूलाई सम्बोधन गर्दै भने, “संसद् कानून निर्माण गर्ने अत्यन्त महत्वपूर्ण थलो हो ।  

यहाँ विरोधका विभिन्न लोकतान्त्रिक तरिका हुन सक्छन्, तर ती सबै मर्यादाभित्र रहनुपर्छ । म यसलाई निर्देशनका रूपमा ग्रहण गर्न आग्रह गर्दछु ।”

उनले संसदको कार्यक्षमता, अनुशासन र विश्वसनीयता कायम राख्न सबै सांसदहरूको समान जिम्मेवारी रहने उल्लेख गर्दै अव्यवस्थित गतिविधिले सदनको कामकारबाही प्रभावित हुन सक्ने चेतावनी पनि दिए ।

सभामुखको निर्देशनपछि पनि श्रम संस्कृति पार्टीका सांसदहरूले भने सरकारविरुद्ध लेखिएको पर्चा घाँटीमा झुन्ड्याएर बैठकमा सहभागी भइरहेका छन् ।

उनीहरूले सरकारको नीति तथा निर्णयप्रति असन्तुष्टि जनाउँदै यसअघि पनि विभिन्न चरणमा सदनभित्र र बाहिर विरोधका कार्यक्रम गर्दै आएका छन् ।