सुलभ अग्रवालले हिरासतभित्रै आइप्याड प्रयोग गरेको भेटिएपछि प्रहरीमाथि छानबिन

काठमाण्डौ । सम्पत्ति शुद्धीकरण कसुरमा पक्राउ परेका सुलभ अग्रवालसँग हिरासतभित्र आइप्याड भेटिएको विषयमा छानबिन सुरू भएको छ । अग्रवालले जिल्ला प्रहरी परिसर ललितपुरको हिरासतभित्रै आइप्याड प्रयोग गरिरहेको भन्ने उजुरी परेपछि प्रहरी प्रशासनले छानबिन समिति गठन गरेको हो ।

समितिले यस विषयमा प्रहरीको भूमिका, सुरक्षा व्यवस्था र नियन्त्रण प्रक्रियाबारे विस्तृत रूपमा छानबिन गर्नेछ ।

यस विषयको अनुसन्धान गर्न काठमाण्डौ उपत्यका प्रहरी कार्यालय रानीपोखरीका डिआइजी ओम अधिकारीको नेतृत्वमा छानबिन प्रक्रिया अघि बढाइएको हो ।  

अग्रवाललाई सम्पत्ति शुद्धीकरण अनुसन्धान विभागले पक्राउ गरी अनुसन्धान गरिरहेको भए पनि विभागको आफ्नै हिरासत नभएकाले उनलाई प्रहरीको नियन्त्रणमा राखिएको थियो ।