इरानमाथि अमेरिकी आक्रमणपछि कच्चा तेलको मूल्य फेरि बढ्यो

काठमाण्डौ । अमेरिकाले इरानमाथि पुनः सैन्य आक्रमण गरेपछि विश्व बजारमा कच्चा तेलको मूल्य बढेको छ। पछिल्लो घटनाक्रमले इरान युद्ध अन्त्य हुने र विश्वको महत्वपूर्ण उर्जा मार्ग स्ट्रेट अफ हर्मुज पूर्ण रूपमा खुल्ने सम्भावनामा अनिश्चितता थपिएको छ।

बिहीबारको प्रारम्भिक कारोबारमा ब्रन्ट क्रुडको मूल्य ०.९९ प्रतिशतले बढेर प्रतिब्यारेल ७८.७९ डलर पुगेको छ । यस्तै डब्लूटीआई क्रुडको मूल्य पनि १.०१ प्रतिशतले वृद्धि भएर प्रतिब्यारेल ७४.२६ डलर कायम भएको छ ।

यसअघि पनि अमेरिकी राष्ट्रपति डोनाल्ड ट्रम्पले इरानमाथि नयाँ आक्रमणको चेतावनी दिएपछि तेल बजारमा तीव्र प्रतिक्रिया देखिएको थियो। त्यसपछि दुवै प्रमुख तेल सूचकांकहरू दुई साताभन्दा बढी अवधिको उच्च स्तरमा पुगेका थिए।

अमेरिकी सेनाले स्ट्रेट अफ हर्मुजबाट व्यापारिक जहाजको आवतजावत सुरक्षित राख्ने उद्देश्यले नयाँ आक्रमण सुरु गरेको जनाएको छ। तर, यस क्षेत्रमा बढ्दो तनावका कारण विश्व उर्जा आपूर्तिमा जोखिम बढेको छ। स्ट्रेट अफ हर्मुज युद्धअघि विश्वव्यापी तेल आपूर्तिको करिब पाँच भागको एक भाग ओसारपसार हुने प्रमुख मार्ग थियो।

इरानले पनि अमेरिकी आक्रमणको जवाफ दिँदै बहराइन र कुवेतस्थित अमेरिकी सैन्यस्थलहरूलाई लक्षित गरी आक्रमण गरेको जनाएको छ। यस घटनापछि मध्यपूर्व क्षेत्रमा थप तनाव बढेको छ।

यसैबीच, समुद्री बीमा कम्पनीहरूले स्ट्रेट अफ हर्मुज हुँदै यात्रा गर्ने जहाजहरूको जोखिम मूल्याङ्कन पुनः समीक्षा गरिरहेका छन्। केही बीमा प्रदायकहरूले सुरक्षा अवस्थाका कारण जहाज सञ्चालकहरूलाई उक्त मार्गमा यात्रा रोक्न वा सावधानी अपनाउन सुझाव दिएका छन्।