(2).gif)
.png)
काठमाण्डौ । विश्वकप फुटबलको सबैभन्दा ठूलो प्रतियोगिता ‘फिफा विश्वकप २०२६’ का विजेताले परम्परागत ट्रफी र पदकसँगै अब ‘च्याम्पियनसिप रिङ’ पनि पाउने भएका छन् ।
फिफाले पहिलोपटक विश्वकप विजेतालाई विशेष ‘च्याम्पियनसिप रिङ’ प्रदान गर्ने घोषणा गरेको छ । फिफाका अनुसार यो विश्वकप इतिहासमै पहिलोपटक विजेता टोलीलाई रिङ प्रदान गर्न लागिएको हो ।
फिफाले कुल २ हजार २६ वटा विशेष रिङ तयार गर्ने योजना बनाएको छ । त्यसमध्ये ३० वटा रिङ विजेता टोलीका खेलाडी तथा टोलीका सदस्यका लागि छुट्याइनेछ भने बाँकी रिङ समर्थकका लागि उपलब्ध गराइनेछ ।
प्रत्येक औँठीमा छुट्टाछुट्टै नम्बर हुनेछ र यसको साथमा आधिकारिकताको प्रमाणपत्र समेत दिइनेछ ।
उत्तर अमेरिका (अमेरिका, क्यानडा र मेक्सिको) मा आयोजना भइरहेको विश्वकप २०२६ मा फिफाले अमेरिकी खेल संस्कृतिमा लोकप्रिय रहेको ‘च्याम्पियनसिप रिङ’ परम्परा फुटबलमा भित्र्याउन लागेको हो ।
आगामी आइतबारका राति न्यू जर्सीको मेटलाइफ स्टेडियममा अर्जेन्टिना र स्पेनबीच विश्वकपको फाइनल खेल हुनेछ । सोही दिन विजेता टोलीलाई प्रतिष्ठित ट्रफी र स्वर्ण पदकसँगै जीतको नयाँ प्रतीकको रूपमा यो ’च्याम्पियनसिप रिंग’ प्रदान गरिनेछ ।
फिफाको कुनै पनि प्रतियोगितामा पहिलो पटक यस्तो औँठी दिन लागिएको हो । यो अमेरिकी खेलकुदको चर्चित परम्परा (जस्तै एनबिए वा सुपर बउलमा दिइने औँठी) बाट प्रभावित छ, जसलाई अब विश्व फुटबलमा पनि लागू गरिँदैछ ।
फाइनल खेल सकिएलगत्तै विजेता टोलीका कप्तान र मुख्य प्रशिक्षकलाई उपहारस्वरूप अस्थायी औँठी प्रदान गरिनेछ। त्यसपछि टोलीका ३० सदस्यका लागि उनीहरूको हातको नापअनुसार विशेष रूपमा तयार पारिएका स्थायी औँठी एक विशेष समारोह आयोजना गरी हस्तान्तरण गरिनेछ ।
यो नयाँ सम्मानले विश्वकप विजेताको ऐतिहासिक उपलब्धिलाई थप विशेष बनाउने अपेक्षा गरिएको छ ।
.png)
.jpg)
