दशैंविदालगत्तै पेट्रोलियम पदार्थको मूल्य वृद्धि

काठमाण्डौ । दशैंविदा सकिएलगत्तै सरकारले पेट्रोलियम पदार्थको मूल्य बढाएको छ ।  

पूर्ण सरकारी स्वामित्वको नेपाल आयल निगमले इण्डियन आयल कर्पोरेसनबाट बढेर नयाँ मूल्यसूची आएको उल्लेख गर्दै आजै राति १२ बजेदेखि लागू हुने गरी इन्धनको मूल्य बढाउने निर्णय गरिएको विज्ञप्तिमार्फत जनाएको हो । 

निगमका अनुसार प्रतिलिटर पेट्रोलको मूल्य एक रुपैयाँ र डिजेल तथा मट्टितेलको मूल्य चार रुपैयाँले बढेको छ ।  

काठमाडौँ, पोखरा र दीपायलमा पेट्रोलको मूल्य १५९ रुपैयाँ, सुर्खेत र दाङ क्षेत्रमा १५८ रुपैयाँ र अन्य क्षेत्रमा १५६‍‍‍.५० रुपैयाँ कायम भएको छ ।  

त्यस्तै, डिजेलको मूल्य काठमाण्डौं, पोखरा र दिपायल क्षेत्रमा प्रतिलिटर १५१ रुपैयाँ, सुर्खेत र दाङ क्षेत्रमा १५० रुपैयाँ र अन्य क्षेत्रमा १४८.५० रुपैयाँ कायम भएको छ ।

इजरायलले दक्षिणी लेबनानमा कारबाही तीव्र बनाएसँगै चर्किएको युद्धका कारण कच्चा तेलको मूल्यमा पछिल्लो समय उछाल आएको छ । यसैको असरले नेपालले भारतबाट आयात गर्ने तयारी इन्धनको मूल्य समेत वृद्धि भएको हो ।