ब्याज आम्दानी घट्दा समाज लघुवित्त ४२.१२ लाख घाटामा, निक्षेप संकलन र कर्जा प्रभाव समेत घट्यो

काठमाण्डौ । समाज लघुवित्त वित्तीय संस्था लिमिटेडले चालु आवको पहिलो त्रैमासको अपरिष्कृत वित्तीय विवरण सार्वजनिक गरेको छ । जसअनुसार संस्था ४२ लाख १२ हजार रुपैयाँ घाटामा रहेको छ । अघिल्लो आवको सोही अवधिसम्म भने संस्थाले ५१ लाख ३० हजार रुपैयाँ खुद नाफा आर्जन गरेको थियो ।  

संस्थाको खुद ब्याज आम्दानीमा गिरावट आएको छ । खुद ब्याज आम्दानी ३०.१२ प्रतिशतले घटेर २० लाख १२ हजार रुपैयाँमा खुम्चिएको छ । संस्थाको अन्य सञ्चालन आम्दानी पनि ८४.४७ प्रतिशतले घटेर ९ लाख ३५ हजार रुपैयाँमा सीमित बनेको छ ।  

यस्तै संस्थाको सञ्चालन मुनाफा पनि ८८ लाख ८५ हजार रुपैयाँले ऋणात्मक छ ।  

यो अवधिसम्म संस्थाको निक्षेप संकलन १६ करोड ५ लाख रुपैयाँबाट घटेर १३ करोड ७६ लाख रुपैयाँ पुगेको छ । संस्थाको कर्जा प्रवाह पनि ४४ करोड २७ लाख रुपैयाँबाट घटेर ४३ करोड ६३ लाख रुपैयाँमा झरेको छ ।  

अघिल्लो आवको पहिलो त्रैमाससम्ममा २ करोड ९६ लाख रुपैयाँ रहेको रिजर्भको आकार घटेर २ करोड ३६ लाख रुपैयाँमा सीमित बनेको छ ।    

समीक्षा अवधिसम्म संस्थाको खराब कर्जा अनुपात ४.४८ प्रतिशत कायम भएको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) २८.०६ रुपैयाँले ऋणात्मक, प्रतिसेयर नेटवर्थ २०३.६४ रुपैयाँ र तरलता अनुपात ३.६७ प्रतिशत कायम भएको छ ।