बक्यौता नपाएको गुनासो चर्कियो, सरकारसम्म पुगे भृकुटी कागजका श्रमिक

काठमाण्डौं । वर्षौंदेखि रोकिएको पारिश्रमिकको माग गर्दै भृकुटी कागज कारखानाका श्रमिकहरू फेरि सडक–सरकार समक्ष पुगेका छन्।  

३३३ जना श्रमिकको बक्यौता उठाउन भन्दै उनीहरूले प्रधानमन्त्री कार्यालयमा ज्ञापनपत्र बुझाएका हुन्।

सफा सुन्दर हरियाली गैँडाकोट निरन्तर शनिवार अभियानको नेतृत्वमा पुगेका श्रमिकहरूले करिब ४० करोड रुपैयाँ तत्काल भुक्तानी गर्न सरकारसँग आग्रह गरेका छन्।  

प्रधानमन्त्री बालेन शाहलाई सम्बोधन गरिएको पत्रमा लामो समयदेखिको आर्थिक संकट, अन्याय र राज्यको उदासीनताप्रति गम्भीर गुनासो समेटिएको छ।

नवलपुरको गैँडाकोटस्थित भृकुटी कागज कारखाना २०६७ सालदेखि बन्द अवस्थामा छ। 

त्यसयता रोजगारी गुमाएका श्रमिकहरू निरन्तर पारिश्रमिकको आशामा बस्दा धेरैको जीवन कठिन बनेको र केहीले न्याय नपाई ज्यानसमेत गुमाएको उल्लेख गरिएको छ।

श्रमिकहरूले कारखानाले ओगटेको करिब ६० बिगाहा जमिनलाई खेर जान नदिई कृषि, औद्योगिक वा व्यवस्थित बजारका रूपमा रूपान्तरण गर्ने ठोस योजना अघि सार्न पनि सरकारलाई आग्रह गरेका छन्।

उनीहरूले माग सम्बोधनका लागि पाँच दिनको अल्टिमेटम दिँदै त्यसपछि चरणबद्ध आन्दोलन सुरु गर्ने चेतावनी दिएका छन्।