सामसुङको बजार पूँजीकरण १ ट्रिलियन डलर पुग्यो, यस्तो उपलब्धि हासिल गर्ने एशियाकै दोस्रो कम्पनी

काठमाण्डौ । दिग्गज दक्षिण कोरियाली इलेक्ट्रोनिक्स कम्पनी सामसुङको बजार पूँजीकरण १ ट्रिलियन अमेरिकी डलर पुगेको छ । कृत्रिम बौद्धिकता(एआई) चिप्सको बढ्दो मागका कारण विश्वकै ठूलो मेमोरी चिप निर्माता मध्ये एक सामसुङको सेयरमूल्यमा पछिल्लो एक वर्षमा ४०० प्रतिशतको उछाल आएको छ ।

बुधबारको कारोबारको क्रममा कम्पनीको सेयरमूल्य १५ प्रतिशतले वृद्धि भएको छ । यसका साथै ताइवानको टीएसएमसी पछि यो उपलब्धि हासिल गर्ने एशियाको दोस्रो कम्पनी बन्न पुगेको हो ।

सामसुङको सेयरमूल्यमा आएको उछालको प्रभाव दक्षिण कोरियाको सेयर बजार मापक इन्डेक्स कोस्पीमा समेत देखिएको छ । आज कोस्पी इन्डेक्स ७  हजार ४ सय विन्दुको उचाई पुग्यो ।

पछिल्लो समय सामसुङका साथ साथै हाईनिक्स र टीएसएमसी जस्ता कम्पनीहरुले विश्व एआई इकोसिस्टममा एशियालाई मुख्य केन्द्रको रुपमा स्थापति गर्न सहयोग पुर्याई रहेका छन् ।

सेमीकन्डक्टर उत्पादनमा दबदबा तथा डेटा पूर्वाधारमा बढ्दो लगानीका कारण लगानीकर्ताहरु चिप निर्मातातर्फ आकर्षित भईरहेका छन् । यही ट्रेण्डका कारण प्रविधि कम्पनीहरुको स्टकमा भारी र्याली देखिदै आएको छ ।

पछिल्लो एक महिनामा एसके हाईनिक्सको सेयर ८१ प्रतिशत र टीएसएमसीको सेयरमूल्य २१.७७ प्रतिशतले बढेका थिए ।

सामसुङको मुनाफामा ४८ गुणाको भारी बढोत्तरी

यसअघि मार्च त्रैमासमा सामसुङको सेमीकन्डक्टर डिभिजनको मुनाफामा वार्षिक आधारमा ४८ गुणाको वृद्धि देखिएको थियो । एआईमा आधारित डेटा सेन्टर्सबाट प्राप्त भईरहेको बलियो माग र आकर्षक मार्जिनका कारण कम्पनीको कमाई उचाईमा पुगेको छ ।

एप्पलसँग सम्भावित साझेदारीको चर्चा

रिपोर्टका अनुसार दिग्गज अमेरिकी टेक कम्पनी एप्पल इंकले अमेरिकामा आफ्नो डिभाइसेसका लागि प्रोसेसर बनाउनका लागि सामसुङसँग साझेदारी गर्ने विषयमा छलफल गरिरहेको छ । यदि यो सम्झौताले अन्तिम रुप पायो भने टीएमसीमाथि एप्पलको लामो समयदेखिको निर्भरता कम गर्ने एउटा उत्तम विकल्प बन्न सक्छ ।