थापाथली–बानेश्वर सडकमा ‘फेसलेस’ ट्राफिक, प्रहरीको भौतिक उपस्थिति घट्दै

काठमाण्डौं । राजधानीका मुख्य चोकहरूमा ट्राफिक व्यवस्थापनलाई आधुनिक बनाउने तयारीस्वरूप थापाथलीदेखि नयाँ बानेश्वर हुँदै माइतीघर मण्डलासम्मको क्षेत्रमा ट्राफिक प्रहरीको प्रत्यक्ष उपस्थिति घटाउने योजना अघि सारिएको छ ।

थापाथली चोकमा लेन उल्लङ्घनका नाममा ‘एम्बुसिङ’ गरेर चिट काट्ने गरेको गुनासो बढेपछि प्रविधिमा आधारित व्यवस्थापनतर्फ ध्यान केन्द्रित गरिएको हो ।

वैशाख २ गते सभामुख डीपी अर्याल सवार गाडीलाई चिट काटिएको घटनापछि उक्त क्षेत्रमा लेन छुट्याउन ट्राफिक कोन राखिएको छ ।  

अब सो सडकखण्डमा मानवीय उपस्थितिभन्दा प्रविधि प्रयोग गरेर ट्राफिक नियन्त्रण गर्ने तयारी भइरहेको छ ।

उपत्यका ट्राफिक प्रहरी कार्यालयका अनुसार ‘फेसलेस ट्राफिक म्यानेजमेन्ट’ लागू गर्ने गरी अध्ययन भइरहेको छ ।

यसअन्तर्गत थापाथली चोक वरपर सेन्सरयुक्त स्वचालित ट्राफिक बत्ती र एएनपीआर (अटोमेटिक नम्बर प्लेट रेकग्निसन) क्यामेरा जडान गर्ने योजना बनाइएको छ ।

यी क्यामेराले सवारी साधनको नम्बर प्लेट पहिचान गरी लेन उल्लङ्घन, तीव्र गति लगायतका नियम उल्लङ्घन स्वतः पत्ता लगाएर नियन्त्रण कक्षमा सूचना पठाउनेछन् ।

त्यसपछि आवश्यक कारबाही अन्य स्थानमा रोकेर वा विद्युतीय प्रणालीमार्फत गर्न सकिने ट्राफिक प्रहरीको योजना छ ।

प्राविधिक पूर्वाधार जडानका लागि सडक विभागसँग समन्वय भइरहेको छ । हाल सञ्चालनमा रहेका सिसिटिभी क्यामेरा पनि थप विस्तार गरिने तयारी छ ।

ट्राफिक प्रहरीले क्रमशः सडकमा आफ्ना जनशक्ति घटाउँदै लैजाने नीति अनुसार थापाथली क्षेत्रमा अहिले सीमित संख्यामा मात्रै प्रहरी परिचालन गर्न थालिएको छ ।

अहिले काठमाडौँ उपत्यकामा २ सय ९३ वटा क्यामेरामार्फत ट्राफिक नियम उल्लङ्घनको निगरानी भइरहेको छ भने दैनिक करिब १५० सवारी साधनमाथि कारबाही हुँदै आएको छ ।  

यसअघि कोटेश्वर, धोबीघाट र महालक्ष्मीस्थानमा एएनपीआर क्यामेरा जडान भइसकेको छ ।

अब थापाथली र बानेश्वर क्षेत्रमा थप आधुनिक क्यामेरा जडान गरेर पूर्ण रूपमा ‘फेसलेस’ ट्राफिक व्यवस्थापन प्रणाली लागू गर्ने तयारी अघि बढाइएको छ ।