सिमेन्ट कम्पनीमा देखिएन लो क्यापको ट्रेन्ड, आधारभुत पक्ष बलिया कम्पनीकै सेयरभाउ महँगो

काठमाण्डौ । धितोपत्र दोस्रो बजारमा चार सिमेन्ट कम्पनी निकै चर्चामा छन् । सर्वसाधारणलाई प्राथमिक सेयर निष्कासनमा बुक बिल्डिङ विधिमार्फत र प्रिमियममा आइपीओ बेचेका कारण पनि सिमेन्ट कम्पनीहरुको चर्चा सदैव रहने गरेको छ ।  

नेप्सेमा सूचीकृत चार सिमेन्ट कम्पनीमा शिवम् सिमेन्ट, सवोत्तम सिमेन्ट, घोराही सिमेन्ट र सोनारपुर मिनरल्स एण्ड आयल रहेका छन्, जुन नेप्सेको उत्पादन तथा प्रशोधन समूहअन्तर्गत रहेका छन् ।  

बजारमा लगानीकर्ताहरुमाझ सिमेन्ट कम्पनीप्रति आकर्षण रहेपनि सबैको वित्तीय अवस्था भने सन्तोषजनक देखिदैन । शिवम् सिमेन्ट र सर्वोत्तम सिमेन्टको अवस्था राम्रो देखिएपनि घोराही र सोनापुर मिनरल्स एण्ड आयलको रिर्पोट भने चित्त बुझ्दौ छैन ।  

दोस्रो बजारमा प्राय वित्तीय रुपमा जुन कमजोर कम्पनी सो कम्पनीकै सेयरभाउ महँगो जस्तो देखिन्छ । तर सिमेन्ट सेक्टरतर्फ भने यस्तो देखिदैन । सिमेन्ट कम्पनीहरुमा सबैभन्दा राम्रो वित्तीय अवस्था रहेको सर्वोत्तम सिमेन्टकै सेयरभाउ सबैभन्दा महँगो छ भने वित्तीय अवस्था कमजोर रहेको सोनापुर मिनरल्स आयलको सेयरभाउ सबैभन्दा सस्तो छ ।  

त्यसो त पछिल्लो समय बजारमा बढी लो क्याप कम्पनीहरु चलिरहेको अवस्था छ । लो क्याप कम्पनीहरुको डिमाण्ड बढाएर सेयरमूल्य उचाल्ने जस्ता गतिविधिहरु पनि नभएका होइनन् । सिमेन्ट कम्पनीहरुमा भने त्यस्तो गतिविधि देखिदैन । सबैभन्दा पुँजी धेरै भएको अर्थात लार्ज क्यापमा ठूलो कम्पनी शिवम् सिमेन्टको सेयभराउ पाँच सय रुपैयाँमाथि छ । त्यस्तै दोस्रो बढी पुँजी भएको सर्वोत्तमको सेयरमूल्य पनि आठसय रुपैयामाथि छ भने लो क्याप अर्थात सबैभन्दा पुँजी कम भएको सोनापुरको सेयरभाउ सबैभन्दा सस्तो छ ।  

नेप्सेमा सूचीकृत सबै समूहका कम्पनीहरुमा एउटै ट्रेण्ड लागू नहुन सक्छ । विशेषगरी अन्य समूहमा लो क्यापहरुको मात्रै सेयरभाउ महँगो र लार्ज क्याप वा मिड क्यापको सेयरभाउ निकै सस्तो देखिन्छ । तर सिमेन्ट कम्पनीहरुमा भने फण्डामेन्टल रुपमा बलिया कम्पनीहरुकै सेयरभाउ महँगो रहेको छ ।  

चालु आवको दोस्रो त्रैमासससम्म सबैभन्दा बढी नाफा कमाउनेमा सर्वोत्तम सिमेन्ट रहेको छ । कम्पनीले २४ करोड १४ लाख रुपैयाँ नाफा कमाएर सर्वाधिक नाफा कमाउने सिमेन्ट कम्पनी बनेको छ ।  

त्यस्तै, दोस्रो बढी नाफा कमाउने शिवम् सिमेन्ट रहेको छ । कम्पनीले पनि ५ करोड ६८ लाख रुपैयाँ नाफा आर्जन गरेको छ । साथै घोराही सिमेन्ट ६६ करोड ७१ लाख रुपैयाँ र सोनापुर मिनरल्स १२ करोड २० लाख रुपैयाँ घाटामा रहेका छन् ।  

सो अवधिसम्म सर्वोत्तमले सिमेन्ट बिक्रीमार्फत ३ अर्ब ९४ करोड रुपैयाँ आम्दानी गर्दा शिवम्ले ३ अर्ब १० करोड रुपैयाँ आम्दानी गरेको छ । यता घोराहीले १ अर्ब ७३ करोड र सोनापुरले जम्मा ९१ करोड ५८ लाख रुपैयाँ आम्दानी गरेको छ ।