दुई बीमा कम्पनीको लाभांश र एक जलविद्युतको हकप्रद सुरक्षित गर्ने आज अन्तिम अवसर

काठमाण्डौ । नेपाल स्टक एक्सचेञ्ज(नेप्से)मा सूचीकृत २ वटा बीमा कम्पनीको लाभांश र एउटा जलविद्युत कम्पनीको हकप्रद सुरक्षित गर्ने आज अन्तिम दिन रहेको छ । आज हिमालयन एभरेष्ट इन्स्योरेन्स र आइएमई लाइफ इन्स्योरेन्सको लाभांश र दोर्दीखोला जलविद्युत कम्पनीको हकप्रद सुरक्षित गर्ने अन्तिम दिन रहेको हो ।  

यी कम्पनीहरुले लाभांश वितरण तथा हकप्रद निष्कासन प्रयोजनका लागि फागुन १५ गते बुक क्लोज गर्दैछन् । फागुन १४ गते महाशिवरात्रीको सार्वजनिक बिदा परेको छ । यसर्थ आजसम्म नेप्सेमा कारोबार भई कायम भएका सेयरधनीहरु मात्रै यी कम्पनीद्वारा प्रस्तावित लाभांश पाउन तथा हकप्रदमा आवेदन दिनका लागि योग्य हुनेछन् ।  

हिमालयन एभरेष्ट इन्स्योरेन्सले गत आवका लागि सेयरधनीहरुलाई ८.७५ प्रतिशत  नगद लाभांश(कर समेत) प्रदान गर्ने प्रस्ताव गरेको छ । कम्पनीद्वारा प्रस्तावित लाभांश यही फागुन २७ गते काठमाण्डौको शंखमुलमा रहेको अनमोल ब्याङक्वेटमा बिहान ११ बजेदेखि आयोजना हुने कम्पनीको ३१ औं साधारण सभाबाट पारित गरिनेछ ।  

यस्तै आइएमई लाइफ इन्स्योरेन्सले पनि आव २०८०/८१ को वितरणयोग्य मुनाफाबाट हाल कायम चुक्तापूँजी ५ अर्ब रुपैयाँको २१.०५२६४ प्रतिशत नगद लाभांश प्रदान गर्ने प्रस्ताव गरेको छ । कम्पनीले लाभांश पारितको मुख्य अजेण्डासहित फागुन २५ गते काठमाण्डौको धुम्बाराहीमा रहेको दियो महलमा बिहान ११ बजेदेखि साधारण सभा आयोजना गर्दैछ ।  

दोर्दीखोला जलविद्युत कम्पनीले शतप्रतिशत अर्थात हाल कायम चुक्ता पूँजी १ अर्ब ५ करोड ४२ लाख ६० हजार ४ सयको १ः१ अनुपातमा प्रतिसेयर रु.१०० अंकित दरका १ करोड ५ लाख ४२ हजार ६०४ कित्ता हकप्रद साधारण सेयर निष्कासन गर्दैछ ।