ट्रम्पले मदुरोविरुद्धको अपरेसन रिसोर्टबाट लाइभ हेरेका थिए, एकसाताअघि आत्मसमर्पण गर्न खबर पठाइएको खुलासा

काठमाण्डौ । अमेरिकी राष्ट्रपति डोनाल्ड ट्रम्पले फक्स न्यूजसँगको टेलिफोन अन्तर्वार्तामा भेनेजुएलाका राष्ट्रपति निकोलस माडुरो र उनकी पत्नी सिलिया फ्लोरेसलाई अमेरिकी विशेष फौजले पक्राउ गरेको विस्तृत जानकारी दिएका छन्। यो अपरेसनलाई ट्रम्पले "सफल र उत्कृष्ट" भनेका छन्।

ट्रम्पका अनुसार, माडुरो र उनकी पत्नी USS Iwo Jima (अमेरिकी नौसेनाको एम्फिबियस असल्ट सिप) मा राखिएका छन् र उनीहरूलाई न्यूयोर्कतर्फ लगिँदैछ, जहाँ उनीहरूले नार्को-टेररिज्म लगायतका आरोपमा अदालती प्रक्रिया सामना गर्नेछन्। ट्रम्पले भने, "मैले एक हप्ताअघि माडुरोसँग कुरा गरेको थिएँ र उनलाई आत्मसमर्पण गर्न आग्रह गरेको थिएँ, तर उनले मानेनन्।"

अन्तर्वार्तामा ट्रम्पले यो अपरेसनलाई आफूले आफ्नो फ्लोरिडास्थित मार-ए-लागो रिसोर्टबाट रियल-टाइममा हेरेको बताए। उनले भने, "म जनरलहरूसँगै बसेर यो सबै टिभी शो जस्तै हेरेको थिएँ। यो अपरेसन डिसेम्बरको मध्यबाट तयारी गरिएको थियो।" अपरेसनमा अमेरिकी फौजलाई कुनै हताहत भएको छैन, तर केही घाइते भएका र एउटा हेलिकप्टरमा क्षति पुगेको तर कुनै विमान नगुमेको ट्रम्पले जानकारी दिए।

ट्रम्पले भेनेजुएलाको भविष्यबारे पनि बोलेका छन्। उनले भने, "हामीले अब निर्णय लिँदैछौं कि कसले देश चलाउने। हामीले कसैलाई माडुरोको ठाउँमा आएर पुरानै काम गर्न दिन सक्दैनौं। हामी यसमा निकै संलग्न हुनेछौं र जनतालाई स्वतन्त्रता दिन चाहन्छौं।" उनले भेनेजुएलाको तेल उद्योगमा पनि अमेरिका "मजबुत रूपमा संलग्न" हुने संकेत दिएका छन्।

भेनेजुएलाको विदेश मन्त्रीले माडुरोलाई अझै पनि देशको वैधानिक नेता भन्दै उनको फिर्ती मागेका छन्। विपक्षी नेता मारिया कोरिना माचाडोको नाममा ट्रम्पले भने, "हामीले यसबारे हेर्नुपर्छ।"

यो अपरेसनलाई अन्तर्राष्ट्रिय स्तरमा आलोचना भए पनि ट्रम्प प्रशासनले यसलाई ड्रग तस्करीविरुद्धको कदम भनेको छ। ट्रम्पले ११ बजे मार-ए-लागोबाट प्रेस कन्फरेन्स गर्ने जानकारी दिएका छन्।