वीरगन्ज नाकाबाट सात महिनामा ५ खर्ब १९ अर्बभन्दा बढीको आयात

काठमाण्डौ । चालु आर्थिक वर्षको पहिलो सात महिनामा वीरगन्ज नाकामार्फत ५ खर्ब १९ अर्ब १ करोड रुपैयाँ बराबरका वस्तु तथा सामान आयात भएको छ। यो परिमाण गत आर्थिक वर्षको सोही अवधिको तुलनामा ५७ अर्ब ३१ करोड रुपैयाँ अर्थात् करिब १२ प्रतिशतले बढी हो।

गत आर्थिक वर्षको सात महिनामा ४ खर्ब ६० अर्ब २३ करोड रुपैयाँ बराबरको आयात भएको थियो।

विशेषगरी पेट्रोलियम पदार्थ तथा फलाम र फलामजन्य सामग्रीको आयात उच्च रहेको छ । तथ्याङ्कअनुसार समीक्षा अवधिमा १ खर्ब ६ अर्ब ४३ करोड रुपैयाँ बराबरको पेट्रोलियम पदार्थ आयात भएको छ। यस्तै, ४६ अर्ब १६ करोड रुपैयाँको फलाम तथा फलामबाट बनेका सामग्री आयात गरिएको छ।

त्यसैगरी ३५ अर्ब ८७ करोड रुपैयाँको मेसिनरी तथा पार्टपुर्जा, ३५ अर्ब ६७ करोड रुपैयाँको भटमासको कच्चा तेल तथा २७ अर्ब ९८ करोड रुपैयाँबराबरको इलेक्ट्रिक मेसिनरी, उपकरण तथा तिनका पार्टपुर्जा आयात भएको भन्सार कार्यालयले जनाएको छ।

आयात संरचनाले ऊर्जा, औद्योगिक कच्चा पदार्थ तथा निर्माण क्षेत्रसँग सम्बन्धित सामग्रीको माग उच्च रहेको संकेत गरेको छ।