मोरङका तीन क्षेत्रमा मतगणना सुरु, रास्वपाको प्रारम्भिक अग्रता

मोरङ । मोरङका तीन वटा प्रतिनिधिसभा निर्वाचन क्षेत्रमा मतगणना सुरु भएको छ। प्रारम्भिक परिणामअनुसार ती क्षेत्रहरूमा राष्ट्रिय स्वतन्त्र पार्टी (रास्वपा) का उम्मेदवारहरूले अग्रता लिएका छन्।

मोरङ क्षेत्र नम्बर १ मा रास्वपाका यज्ञमणि न्यौपानेले ९६७ मत प्राप्त गरेका छन्। उनलाई श्रम संस्कृति पार्टीकी शान्ति पाख्रिनले ६४३ मतसहित पछ्याइरहेकी छन्। नेपाली कांग्रेसका खड्ग फागोले ४३७ र नेकपा एमालेका घनश्याम खड्काले २३७ मत प्राप्त गरेका छन्।

त्यसैगरी, मोरङ क्षेत्र नम्बर ४ मा रास्वपाका सन्तोष राजवंशीले १,६३० मतसहित अग्रता कायम गरेका छन्। नेपाली कांग्रेसका महामन्त्री गुरुराज घिमिरेले ३६० मत प्राप्त गरेका छन् भने नेकपाका अमनलाल मोदीले ३३८ र नेकपा एमालेका जीवन घिमिरेले २५२ मत पाएका छन्।

मोरङ क्षेत्र नम्बर ५ मा रास्वपाकी आशा झाले १,२२९ मत प्राप्त गर्दै अग्रता लिएकी छन्। जनता समाजवादी पार्टी (जसपा) का राजकुमार यादवले ५६५ मत पाएका छन् भने नेकपाका शिवकुमार मण्डलले ३४५ र नेपाली कांग्रेसका फुलकुमार लालवानीले ३२७ मत प्राप्त गरेका छन्।