हार स्वीकार्दै रेणु दाहालको भनाइ: कामले मन जितेँ, मत जित्न सकिनँ

काठमाडौं । प्रतिनिधिसभा निर्वाचन चितवन–३ मा पराजित भएपछि नेकपाकी उम्मेदवार रेणु दाहालले हार स्वीकार गर्दै जनताको मतलाई सम्मान गर्ने बताएकी छन्।

सामाजिक सञ्जालमार्फत प्रतिक्रिया दिँदै दाहालले आफूले काममार्फत जनताको मन जिते पनि मत जित्न नसकेको उल्लेख गरेकी छन्। उनले निर्वाचनमा विजयी भएकी सोविता गौतमलाई बधाई दिँदै सफल कार्यकालको शुभकामना समेत व्यक्त गरेकी छन्।

दाहालले झण्डै ३० वर्षको आफ्नो राजनीतिक जीवनमध्ये करिब ९ वर्ष भरतपुर महानगरको विकास, समृद्धि र सुशासनका लागि समर्पित गरेको उल्लेख गरेकी छन्। विकासका लागि जनताको पक्षमा नीति–नियम आवश्यक रहेको महसुस गर्दै भरतपुर महानगरपालिकाको प्रमुख पदको कार्यकाल बाँकी हुँदाहुँदै प्रतिनिधिसभा निर्वाचनमा उम्मेदवारी दिएको उनको भनाइ छ।

उनले मत परिणाम आइसकेपछि जनताको अमूल्य मतलाई सम्मान गर्ने बताउँदै आफूलाई विश्वास गरेर मतदान गर्ने सबै मतदाताप्रति आभार व्यक्त गरेकी छन्। “यो सुनामीजस्तै लहरका बीच पनि मलाई विश्वास गरेर मतदान गर्नुहुने सम्पूर्ण मतदाताप्रति म ऋणी छु,” उनले लेखेकी छन्।

दाहालले चुनावी अभियानमा खटिएका पार्टीका नेता–कार्यकर्ता, समर्थक, शुभेच्छुक, मिडियाकर्मी तथा कलाकारहरूप्रति पनि धन्यवाद व्यक्त गरेकी छन्।

उनले आगामी दिनमा पनि चितवनवासीको हित, विकास र समृद्धिका लागि निरन्तर साथ रहने प्रतिबद्धता व्यक्त गर्दै नयाँ निर्वाचित प्रतिनिधिले जनताको विश्वासअनुसार काम गर्ने अपेक्षा व्यक्त गरेकी छन्।