एसियामा ११ जना नेपाली अफवाह फैलाएको आरोपमा पक्राउ

काठमाण्डौ । पश्चिम एसियाका विभिन्न देशहरूले सामाजिक सञ्जालमार्फत अफवाह फैलाएको आरोपमा हालसम्म ११ जना नेपालीलाई पक्राउ गरेका छन् ।

परराष्ट्र मन्त्रालयका अनुसार पक्राउ परेकामध्ये संयुक्त अरब इमिरेट्स (यूएई) मा ३ जना, साउदी अरेबिया मा ४ जना, कतार मा ३ जना र ओमान मा १ जना रहेका छन् ।

युद्धको प्रभावमा रहेका पश्चिम एसियाली देशहरूले सामाजिक सञ्जालमा फैलाइने भ्रामक सन्देशप्रति कडाइ गरिरहेका छन् । ती देशहरूले यस्तो गतिविधिमा संलग्न व्यक्तिहरूलाई पक्राउ गर्ने मात्र नभई देश निकाला (डिपोर्ट) सम्मको कारबाही गर्ने चेतावनी दिएका छन् ।

परराष्ट्र मन्त्रालयले शुक्रबार आयोजना गरेको पत्रकार सम्मेलनमा प्रवक्ता लोक बहादुर पौडेल क्षेत्री ले सामाजिक सञ्जालमा भ्रम फैलाउने खालका फोटो तथा भिडियो सार्वजनिक गरेको आधारमा उनीहरूलाई पक्राउ गरिएको जानकारी दिए ।