सरकारको १०० दिने एजेन्डा कार्यान्वयन: फेवाताल अतिक्रमण हटाउन थालियो

काठमाण्डौ । पोखरा महानगरपालिकाले फेवाताल आसपासमा बनेका अवैध टहराहरू हटाउने अभियान थालेको छ। शनिबार बिहानदेखि डोजर प्रयोग गर्दै ताल क्षेत्र वरिपरिका संरचनामा कारबाही सुरु गरिएको हो।

महानगर प्रहरी प्रमुख पुरुसोत्तम थापाका अनुसार अहिलेसम्म ३२ वटा टहरा भत्काइसकिएको छ। नेपाल प्रहरीको सहकार्यमा उक्त अभियान सञ्चालन भइरहेको उनले जानकारी दिए।

फेवाताल क्षेत्रमा बढ्दो अतिक्रमण नियन्त्रण गर्ने उद्देश्यले महानगरले यो कदम अघि बढाएको हो। यसअघि नवगठित संघीय सरकारले पनि फेवातालको अतिक्रमण तीन महिनाभित्र हटाउने निर्णय गर्दै यसलाई आफ्नो १०० दिने कार्यसूचीमा समेटेको थियो।