भारतसँग जिटुजीमार्फत मल खरिद हुँदै

काठमाण्डौ । अन्तर्राष्ट्रिय बजारमा रासायनिक मलको आपूर्ति अस्थिर बन्दै गएको अवस्थामा सरकारले छिमेकी मुलुक भारतसँग सरकार–सरकार (जिटुजी) प्रणालीमार्फत मल खरिद प्रक्रिया अघि बढाएको छ। कृषि तथा पशुपन्छी विकास मन्त्रालयले आपूर्ति सुरक्षालाई प्राथमिकता दिँदै एक लाख ५० हजार मेट्रिक टन मल आयात गर्ने पहल गरेको जनाएको छ।

मन्त्रालयका अनुसार प्रस्तावित खरिदमा एक लाख मेट्रिक टन युरिया र ५० हजार मेट्रिक टन अन्य रासायनिक मल समावेश छन्। परराष्ट्र मन्त्रालयमार्फत भारत सरकारसँग गरिएको औपचारिक पत्राचारमा सकारात्मक संकेत प्राप्त भएको बताइएको छ।

पश्चिम एसियामा जारी द्वन्द्वका कारण मल उत्पादन तथा ढुवानी प्रणाली प्रभावित हुँदा अन्तर्राष्ट्रिय बजारमा मूल्य वृद्धि र आपूर्ति अवरोध देखिएको छ।

हाल मन्त्रालयसँग करिब एक लाख ७० हजार मेट्रिक टन मल मौज्दात रहेको छ, जसले असारसम्मको माग धान्न सक्ने अनुमान गरिएको छ। तर युद्ध लम्बिएमा आपूर्ति शृंखला थप प्रभावित हुने जोखिम औंल्याइएको छ।

अर्थ मन्त्रालयले आगामी आर्थिक वर्षका लागि मल खरिदमा २० अर्ब रुपैयाँको स्रोत सुनिश्चित गरिसकेको छ।