११ महिनामा ४७ अर्ब बढी एफडीआई प्रतिबद्धता, ९१४ वटा परियोजना स्वीकृत

काठमाण्डौ । चालु आर्थिक वर्षको ११ महिनामा ४७ अर्ब बढी प्रत्यक्ष वैदेशिक लगानी (एफडीआई)को प्रतिबद्धता आएको छ । उद्योग विभागका अनुसार यो अवधिमा ४७ अर्ब ६१ करोड ६९ लाख ४६ हजार रुपैयाँबराबरको एफडीआई स्वीकृत भएको हो ।

स्वीकृत भएको कुल एफडीआईमा अटोमेटिक रुटबाट ७ अर्ब ७१ करोड र अप्रुभल रुटबाट ३९ अर्ब ९० करोड रुपैयाँ बराबर एफडीआई स्वीकृत भएको विभागको तथ्यांकले देखाउछ ।

यस्तै यस अवधिमा कुल ९१४ वटा परियोजना स्वीकृत भएका छन् । जसबाट  २५ हजार ४५० जनाले रोजगारी पाउने अनुमान सरकारको छ। स्वीकृत भएका कुल परियोजनामध्ये २०३ वटा अप्रुभल रुटबाट र ७११ वटा अटोमेटिक रुटबाट दर्ता भएको विभागले जनाएको छ ।

यस्तै यस अवधिसम्म ५ हजार २४८ उद्योग दर्ता भएका छन् । यसबाट ६ खर्ब ६० अर्ब ४३ करोड ८९ लाख रुपैयाँ बराबरको वैदेशिक लगानी प्रतिबद्धता भएको छ ।

जेठ महिनामा मात्रै १८६ परियोजना स्वीकृत भएका छन् । जसमध्ये १८३ वटा साना स्केलका उद्योग छन् भने ३ वटा मध्यम स्केलका छन् । यो महिनामा ठूला स्केलका उद्योग भने एउटा पनि स्वीकृत भएको छैन ।

यो अवधिमा सूचना प्रविधि क्षेत्रमा सर्वाधिक उद्योगले स्वीकृती प्राप्त गरेका छन् । यस अवधिमा सूचना प्रविधि क्षेत्रका ५७७ वटा उद्योग स्वीकृत भएका छन् ।

यस्तै विभागका अनुसार जेठ महिनामा २ अर्ब २९ करोड ५३ लाख रुपैयाँ बराबरको वैदेशिक लगानी स्वीकृत भएको छ ।