इक्वेडरसँग गोलरहित बराबरी गर्दै कुरासाओले हासिल गर्यो पहिलो अंक

काठमाण्डौ । फिफा विश्वकप २०२६ अन्तर्गत समूह ‘ई’ को खेलमा सानो टोली कुरासाओले दक्षिण अमेरिकी शक्तिशाली राष्ट्र इक्वेडरसँग गोलरहित ऐतिहासिक बराबरी खेल्दै विश्वकप इतिहासमा आफ्नो पहिलो अंक हात पारेको छ।

खेलभरि इक्वेडरले आक्रामक प्रदर्शन गर्दै लगातार अवसर सिर्जना गरे पनि कुरासाओका गोलरक्षक इलोई रुम असाधारण लयमा देखिए। उनले १५ उत्कृष्ट बचाउ गर्दै टोलीलाई हारबाट जोगाए। यो प्रदर्शन विश्वकप इतिहासमा एकै खेलमा सर्वाधिक बचाउ गर्ने कीर्तिमानभन्दा केवल एक बचाउले कम हो। सन् २०१४ मा टिम हावार्डले बेल्जियमविरुद्ध १६ बचाउ गरेका थिए।

इक्वेडरले अधिकांश समय बल नियन्त्रणमा राख्दै गोलका लागि २८ प्रहार गरेको भए पनि कुरासाओको अनुशासित रक्षापंक्ति र रूमको उत्कृष्ट प्रदर्शनका कारण गोल गर्न असफल रह्यो।

यस नतिजासँगै समूह ‘ई’ मा समीकरण थप रोचक बनेको छ। यसअघि जर्मनीले आईभरी कोस्टलाई २–१ ले पराजित गर्दै समूह विजेताको रूपमा नकआउट चरणमा स्थान सुरक्षित गरिसकेको छ। इक्वेडर भने अन्तिम समूह खेलमा जर्मनीविरुद्ध सकारात्मक नतिजा निकाल्न दबाबमा परेको छ।