विश्वकपमा केप भर्डेको अर्को चमत्कार, दुईपटकको विश्व विजेता उरुग्वेसँग २–२ को बराबरी

काठमाण्डौ । मियामीमा सम्पन्न फिफा विश्वकप समूह ‘एच’ अन्तर्गतको खेलमा विश्वकपमा पहिलोपटक सहभागी भएको केप भर्डेले दुईपटकको विश्व विजेता उरुग्वे लाई २–२ को बराबरीमा रोक्दै आफ्नो प्रभावशाली यात्रा जारी राखेको छ। यसअघि स्पेनसँग गोलरहित बराबरी खेलेको केप भर्डेले फेरि एकपटक बलियो प्रतिद्वन्द्वीविरुद्ध उत्कृष्ट प्रदर्शन गर्‍यो।

खेलको २१औँ मिनेटमा केभिन पिना ले आकर्षक फ्रिकिकमार्फत गोल गर्दै केप भर्डेलाई अग्रता दिलाएका थिए। यो गोल विश्वकप इतिहासमा केप भर्डेको पहिलो गोल समेत बनेको थियो।

अग्रता गुमाएपछि आक्रामक बनेको उरुग्वेले पहिलो हाफमै पुनरागमन गर्‍यो। म्याक्सी अराउजो ले बराबरी गोल फर्काए भने इन्जुरी समयमा अगुस्टिन कानोब्बियो ले गोल गर्दै उरुग्वेलाई २–१ को अग्रता दिलाए।

तर दोस्रो हाफमा उरुग्वेली रक्षापङ्क्तिको ठूलो गल्तीको फाइदा उठाउँदै हेलियो भरेला ले सहज गोल गरेपछि केप भर्डे खेलमा फर्कियो। त्यसपछि दुवै टोलीले विजयी गोलका अवसर सिर्जना गरे पनि स्कोर थप बदलिन सकेन।

बराबरीसँगै उरुग्वे र केप भर्डे दुवैले दुई खेलबाट समान २ अंक जोडेका छन्। समूह चरणको अन्तिम खेलअघि दुवै टोलीको नकआउट चरण पुग्ने सम्भावना जीवित रहेको छ। केप भर्डेले अन्तिम खेलमा साउदी अरेबिया को सामना गर्नेछ भने उरुग्वेले बलियो टोली स्पेन विरुद्ध खेल्नेछ।

केप भर्डेले यस खेलमा केवल रक्षात्मक रणनीतिमा सीमित नरही आक्रामक फुटबल पनि खेल्न सक्ने क्षमता प्रदर्शन गरेको छ। तीव्र काउन्टर आक्रमण र आत्मविश्वासपूर्ण खेलशैलीले टोलीलाई प्रतियोगिताको ‘डार्क हर्स’ का रूपमा स्थापित गरिरहेको छ। अर्कोतर्फ, उरुग्वेले अवसर सिर्जना गरे पनि त्यसलाई गोलमा परिणत गर्न नसक्नु फेरि कमजोरीका रूपमा देखिएको छ।