विराटनगरबाट हराएको २० हजार लिटर पेट्रोल बोकेको ट्याङ्कर सुनसरीमा फेला, ९७३ लिटर चोरी पुष्टि

काठमाण्डौ । नेपाल आयल निगमको कोशी प्रादेशिक कार्यालय, विराटनगरका लागि २० हजार लिटर पेट्रोल बोकेर हराएको ट्याङ्कर सुनसरीको भोक्राहा गाउँपालिका–८ मा बेवारिसे अवस्थामा फेला परेको छ ।  

असार १० गते बुधबार जिल्ला प्रशासन कार्यालय मोरङ, जिल्ला प्रहरी कार्यालय मोरङ, पत्रकार र सरोकारवालाको रोहबरमा ट्याङ्करको सिल खोलेर गुणस्तर तथा परिमाण जाँच गरिएको छ।

जाँचका क्रममा पेट्रोलको गुणस्तर ठीक पाइए पनि २० हजार लिटरमध्ये ९७३ लिटर पेट्रोल चोरी भएको पुष्टि भएको छ।  

ट्याङ्करमा बाँकी रहेको १९ हजार २७ लिटर पेट्रोल निगमको भण्डारणमा खाली गरिएको छ।

को १ ख ६१९० नम्बरको ट्याङ्कर असार ८ गते बिहान पार्किङस्थलबाट हराएको थियो । 

प्रहरी अनुसन्धानमा ट्याङ्कर बिहान ३स्०३ बजे पार्किङबाट बाहिरिएको पुष्टि भएको थियो र फेला पर्दा यसको ताला काटिएको थियो।  

निगमले पेट्रोलियम पदार्थ ढुवानी विनियमावली, २०७३ अनुसार चोरी भएको पेट्रोलको दोब्बर रकम ढुवानीकर्ताबाट असुल गरिसकेको जनाएको छ।