मनोनयनमा जाँदा तडकभडक गर्ने उम्मेद्वारलाई कारबाही गरिने

काठमाण्डौ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले मनोनयन दर्ता गर्ने क्रममा बाजागाजा, धुमधाम वा कुनै पनि प्रकारको तडकभडक नगर्न कडा चेतावनी दिएका छन्।

सोमबार आयोगमा सञ्चारकर्मीहरूसँग कुरा गर्दै उनले पूर्ण निषेध भएको स्पष्ट पारे। कानुन र निर्वाचन आचारसंहिताले यस्ता दिखावा तथा भव्य प्रदर्शनलाई बन्देज लगाएको उल्लेख गर्दै उनले भने, ‘मनोनयन दर्ताका लागि जाँदा बाजा बजाउने, भीडभाड गर्ने वा अन्य कुनै तडकभडक नगर्नुहोस्। यो नियम तोडेमा आयोगले कुनै पनि नरम व्यवहार गर्दैन।’

उनले आचारसंहिता उल्लंघन गर्ने जो कोहीमाथि कठोर कारबाही हुने पनि चेतावनी दिए। उम्मेदवार तथा दलहरूलाई सरल, मर्यादित र निष्ठापूर्वक आचारसंहिता पालना गरेर मनोनयन पत्र बुझाउन उनले आग्रह गरे।

भण्डारीले यो निर्वाचन पूर्ण रूपमा स्वच्छ, स्वतन्त्र, निष्पक्ष र त्रासरहित वातावरणमा सम्पन्न हुने दाबी गरे। यदि सबैले नियमको पालना गरे भने घरेलु मतदातादेखि विदेशमा बस्ने नेपालीहरूले समेत यो निर्वाचनमाथि पूर्ण विश्वास गर्न सक्ने उनको भनाइ छ। ‘कुनै प्रकारको शंका वा आशंका रहन दिनुहुँदैन,’ उनले थपे।

आयोगले यस्ता नियमहरूको कडाइका साथ पालना गराउने प्रतिबद्धता व्यक्त गरेको छ, जसमा उल्लंघन भएमा जरिवाना वा उम्मेदवारी रद्द गर्ने जस्ता कदम चाल्न सकिने व्यवस्था छ।