चन्द्रागिरी हिल्स ४.७० करोड घाटामा, आम्दानीमा ४१% को गिरावट

काठमाण्डौ । चन्द्रागिरी हिल्स लिमिटेडले घाटामा गएको छ । कम्पनीले सार्वजनिक गरेको चालु आवको दोस्रो त्रैमासिक प्रतिवेदन अनुसार कम्पनी ४ करोड ७० लाख रुपैयाँ घाटामा गएको हो ।

अघिल्लो आवको सोही अवधिसम्म भने कम्पनीले ६ करोड ६४ लाख रुपैयाँ खुद नाफा आर्जन गरेको थियो ।

कम्पनीको आम्दानी समेत घटेको छ । अघिल्लो आवमा ४२ करोड २५ लाख रहेको कम्पनीको आम्दानी ४१.०८ प्रतिशतले घटेर २४ करोड ८९ लाखमा सीमित बनेको छ ।

गत भदौ २३ र २४ गते भएको जेनजी आन्दोलनका क्रममा कम्पनीको भौतिक संरचना तथा केवलकारका उपकरणमा क्षतिका कारण गत त्रैमासिकको बाँकी अवधिभर कम्पनीको आर्थिक गतिविधिहरु पूर्ण रुपमा ठप्प रहेको थियो । तर यस त्रैमासको मध्य अवधिदेखि अर्थात मंसिर १५ गतेबाट कम्पनीको कारोबार पुनः सञ्चालनमा आएको छ ।

कम्पनीको कारोबारको मुख्य समयमा भएको बन्द कम्पनीलाई आर्थिक रुपमा ठूलो नोक्समनी भएको र यसको परिपूर्तिका लागि प्रतिवद्ध रहेको कम्पनीले जनाएको छ ।

कम्पनी खर्च नियन्त्रण गर्न भने सफल भएको छ । कम्पनीले कुल १२ करोड ४८ लाख रुपैयाँ कुल खर्च गरेको छ । यो भनेको अघिल्लो आवको तुलनामा ११.०७ प्रतिशतले कम हो । यस्तै कम्पनीको वित्त खर्च समेत ८ करोड ७३ लाखबाट घटेर ६ करोड ७४ लाखमा सीमित बनेको छ ।  

अघिल्लो आवमा ४१ लाख ९५ हजार रुपैयाँले ऋणात्मक रहेको कम्पनीको रिजर्भको आकार ४ करोड ६२ लाखले धनात्मक बनेको छ । कम्पनीको कुल चालु सम्पत्ति ४९ करोड १४ लाख र कुल चालु दायित्व १३ करोड ६१ लाख रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस) ३.०७ रुपैयाँले ऋणात्मक, प्रतिसेयर नेटवर्थ १०३.०२ रुपैयाँ, पीई रेसियो २७७.६८ गुणा ऋणात्मक र तरलता अनुपात ३.६१ प्रतिशत कायम भएको छ ।