आज यी क्षेत्रमा चट्याङसहित वर्षाको सम्भावना

काठमाण्डौ । मौसम पूर्वानुमान महाशाखाका अनुसार आज दिउँसो हिमाली क्षेत्रमा सामान्य बदली रहने अनुमान छ भने पहाडी र तराई क्षेत्रमा आंशिक बदली रहनेछ ।  

कोशी प्रदेशका पहाडी तथा हिमाली भागका केही स्थानहरूमा र बागमती, गण्डकी, कर्णाली तथा सुदूरपश्चिमका हिमाली क्षेत्रमा एक–दुई ठाउँमा मेघगर्जन र चट्याङसहित हल्का वर्षा तथा हिमपात हुन सक्ने सम्भावना रहेको छ ।

आज राति कोशी, गण्डकी र कर्णाली प्रदेशका हिमाली क्षेत्रमा प्रायः बदली रहनेछ भने अन्य हिमाली भागमा आंशिक बदली रहनेछ। पहाडी र तराई क्षेत्रमा भने मौसम प्रायः सफा रहने अपेक्षा गरिएको छ। साथै, कोशी र गण्डकी प्रदेशका हिमाली क्षेत्रमा एक–दुई स्थानमा हल्का वर्षा तथा हिमपातको सम्भावना रहेको छ ।

कोशीसहित बागमती, गण्डकी, लुम्बिनी र कर्णाली प्रदेशका पहाडी तथा हिमाली भागका केही स्थानहरूमा तथा सुदूरपश्चिम प्रदेशका हिमाली क्षेत्रमा एक–दुई ठाउँमा मेघगर्जन, चट्याङसहित मध्यम वर्षा र हिमपात हुन सक्ने भएकाले मौसमको पछिल्लो अवस्थाबारे जानकारी राख्न र आवश्यक सतर्कता अपनाउन महाशाखाले सर्वसाधारणलाई आग्रह गरेको छ ।