एनसेलको ठूलो अफर: अनलिमिटेड डेटा र कल अब रु ६९९ मा, शुल्क ६५% घट्यो

काठमाण्डौ । Ncell ले नयाँ वर्ष २०८३ को अवसर पारेर आफ्ना प्रिपेड ग्राहकका लागि अनलिमिटेड सेवा सहितको आकर्षक कम्बो प्याक सार्वजनिक गरेको छ। कम्पनीले कल र इन्टरनेट सेवाको शुल्क आक्रामक रूपमा घटाउँदै यो अफर ल्याएको हो।

यस नयाँ प्याकमा ग्राहकले २८ दिनसम्म अनलिमिटेड डेटा, कुनै पनि नेटवर्कमा अनलिमिटेड कल, दैनिक १०० एसएमएस तथा Lionsgate Play मा निःशुल्क पहुँच प्राप्त गर्न सक्नेछन्।

कम्पनीका अनुसार यसअघि उपलब्ध रु १९९९ पर्ने अनलिमिटेड सेवा अब करसहित रु ६९९ मा उपलब्ध गराइएको छ, जसले कुल शुल्कमा करिब ६५ प्रतिशत कमी ल्याएको छ।

यो प्याक ग्राहकले सजिलै *१२३# डायल गरेर लिन सक्नेछन्। साथै Ncell App, नजिकैको एनसेल सेन्टर वा आधिकारिक पसलबाट पनि खरिद गर्न सकिन्छ।

एनसेलका चीफ कन्सुमर बिजनेस अफिसर उपाङ्ग दत्ताका अनुसार दूरसञ्चार सेवाको बढ्दो मागलाई ध्यानमा राख्दै यो योजना ल्याइएको हो। “यो प्याकले कम लागतमा ‘बेस्ट भ्यालु’ प्रदान गर्दै ग्राहकलाई सधैं कनेक्टेड राख्न सहयोग गर्नेछ,” उनले बताए।

उनका अनुसार डिजिटल जीवनशैलीलाई प्रवर्द्धन गर्दै अनलाइन कारोबार, वर्क फ्रम होम, अध्ययन, गेमिङ तथा मनोरञ्जनमा सहजता ल्याउने उद्देश्यले यस्तो योजना ल्याइएको हो।

यस प्याकअन्तर्गत उपलब्ध Lionsgate Play मार्फत ग्राहकले हलिउड फिल्म, टिभी शो, ओरिजिनल कन्टेन्ट तथा वृत्तचित्रहरू हेर्न सक्नेछन्। उक्त एप Google Play Store, Apple App Store तथा Amazon Fire TV Stick मार्फत डाउनलोड गर्न सकिनेछ।