(2).gif)
.jpg)
.png)
काठमाण्डौ । जापान र अमेरिकाले कमजोर बन्दै गएको जापानी येनलाई समर्थन गर्न विदेशी मुद्रा बजारमा संयुक्त हस्तक्षेप गरेको पुष्टि गरेका छन्। जापानको अर्थ मन्त्रालयले सोमबार गत शुक्रबार अमेरिकी ट्रेजरीसँग समन्वय गरी येन खरिद अभियान सञ्चालन गरिएको जनाएको हो। दुवै देशले मुद्रा बजारमा अस्वाभाविक उतारचढाव देखिए आवश्यक परे थप संयुक्त कदम चाल्ने संकेत दिएका छन्।
जापानका अर्थमन्त्री सत्सुकी कटायामाले टोकियो अमेरिकी ट्रेजरीसँग निरन्तर सम्पर्कमा रहेको बताउँदै भविष्यमा पनि आवश्यक परे समन्वयात्मक हस्तक्षेप गर्न नहिच्किचाउने बताएका छन्। जापानी अर्थ मन्त्रालयका अनुसार यो कदम जापान र अमेरिकाका अर्थमन्त्रीहरूको सेप्टेम्बर २०२५ को संयुक्त वक्तव्यअनुसार येनमा देखिएको अत्यधिक अस्थिरता र अव्यवस्थित गतिविधि नियन्त्रण गर्ने उद्देश्यले चालिएको हो।
येन केही समयअघि अमेरिकी डलरको तुलनामा करिब चार दशकयताकै कमजोर अवस्थामा पुगेको थियो। बिहीबार एक डलर बराबर १६३.७३ येन पुगेको विनिमय दर शुक्रबारको हस्तक्षेपपछि १५७.५७ येनमा झरेको थियो। सोमबार कारोबारका क्रममा यो करिब १५७.७० येन आसपास रहेको थियो।
अमेरिकी ट्रेजरी सचिव स्कट बेसेन्टले पनि संयुक्त कारबाहीको पुष्टि गर्दै शुक्रबारको हस्तक्षेपले येनमा देखिएको अव्यवस्थित गतिविधिलाई नियन्त्रण गर्न सहयोग गरेको बताएका छन्। उनले जापानसँग थप संयुक्त हस्तक्षेपका लागि अमेरिकी पक्ष तयार रहेको बताएका छन्।
अमेरिकी राष्ट्रपति डोनाल्ड ट्रम्पले पनि अमेरिकाले जापानलाई सहयोग गर्ने उद्देश्यले हस्तक्षेपमा सहभागी भएको बताएका छन्। उनले यो कदम दुई देशबीचको सम्बन्ध र विश्व आर्थिक स्थिरताका लागि समर्थनको संकेत भएको उल्लेख गरेका छन्।
जापानले भविष्यमा अमेरिकी फेडरल रिजर्भको रिपो सुविधा प्रयोग गर्ने योजना पनि सार्वजनिक गरेको छ। उक्त सुविधामार्फत स्वीकृत विदेशी केन्द्रीय बैंक तथा मौद्रिक निकायहरूले अमेरिकी ट्रेजरी धितोपत्रको अस्थायी साटफेर गरेर छोटो अवधिका लागि अमेरिकी डलर तरलता प्राप्त गर्न सक्छन्।
तर केही विश्लेषकहरूले संयुक्त हस्तक्षेपको प्रभावबारे प्रश्न उठाएका छन्। पेटरसन इन्स्टिच्युट फर इन्टरनेसनल इकोनोमिक्सका वरिष्ठ फेलो रोबिन ब्रुक्सले अमेरिकाले डलरको सट्टा अन्य मुद्रा प्रयोग गरेर येन खरिद गरेको भए बजारमा यसको प्रभावकारिताबारे शंका उत्पन्न हुन सक्ने बताएका छन्।
.png)
(1)(1).jpg)
.jpg)
.jpg)
