अर्थमन्त्रीले फेरि भने-'सेयर बजारबाट जति कमाए पनि अन्तिम भनेर तय भएअनुसारकै कर तिर्ने हो, भ्रम नछरौं'

काठमाण्डौ । अर्थमन्त्री डा. स्वर्णिम वाग्लेले सेयर लगानीकर्ताहरुको मागअनुसार नै पूँजीगत लाभकर बढाइएको भन्दै वर्षौदेखि अनिश्चितता अन्त्य गरिएको विषयमा भ्रम नछर्न पुनः आह्वान गरेका छन् ।  

नेपाल आर्थिक पत्रकार संघ-नाफिज)ले सोमबार काठमाण्डौमा आयोजना गरेको पोष्ट बजेट छलफलका क्रममा उनले पुनः केही बढेर फाइनल गरिएको पूँजीगत लाभकर नै सेयर बजारमा लाग्ने अन्तिम कर भएको प्रष्टीकरण दिएका हुन् । 

'सेयर बजारमा केही बढाएर फाइनल गरिएको पूँजीगत लाभकर नै अन्तिम कर हो । यसको विषयमा भ्रम छर्ने काम बन्द गर्नुहोला ।' उनले भने-'कसैको २० ३० वटा आम्दानीको स्रोत छ भने पनि सेयरबाट हुने आम्दानीको अलग्गै कर तिर्ने हो । बाँकीको त आफ्नै हिसाबकिताब छँदैछ ।' 

उनले ७.५ प्रतिशतबाट १० र ५ बाट ७.५ प्रतिशत लाभकर पुर्याउने काम सरकारले लगानीकर्ताहरुकै सुझावअनुसार गरेको समेत दोहोर्याएका छन् ।  

'हामीले सेयर बजारमा लामो समयदेखि व्याप्त अन्तिम करसम्बन्धी अनिश्चितता अन्त्य गरिदिएका हौं ।'-डा. वाग्लेले भने ।