सस्ता सेयरभाउ भएका ३५ कम्पनी, लगानी गर्दा रिटर्न पाउने सम्भावना कति ?

काठमाण्डौ । गत साउन महिनामा ३ हजारको विन्दुमा पुगेको नेप्से परिसूचक अहिले घटेर २६६५ को विन्दुमा कायम भएको छ । दुई महिनाको अन्तरालमा सेयरबजार १२.५७ प्रतिशतले घट्न पुगेको छ ।  

देशको अर्थतन्त्र सकारात्मक देखिएपनि पछिल्लो समयको राजनीतिक अस्थिरताका कारण सेयरबजारमा करेक्सन देखिएको बजार जानकारहरुले बताएका छन् । दशैंपछि तीनदिन सेयरबजारमा सुधार देखिएपनि त्यसपछिको दुईदिन बजारमा ठूलो करेक्सन देखिएको थियो ।  

आज पुनः बजारले लय समातेको छ । बजारमा राजनीतिक परिस्थितले गर्दा उतारचढाव देखिएको बजार जानकारहरुको भनाई छ । तर बजारको हिस्ट्री प्याटर्न हेर्दा बजार बढ्न सक्ने जानकारहरुले अनुमान लगाएका छन् ।  

हाल २६ सयको विन्दुमा रहेको नेप्से परिसूचक बढेर ३ हजार क्रस हुने जानकारहरुले अनुमान लगाइरहेका छन् । जानकारहरुका अनुसार सेयरबजारमा लगानी गर्न चाहानेहरुका लागि अहिले उपयुक्त समय हुन सक्छ । लाभांश सिजन भएकाले दीर्घकालिन लगानी गर्न अहिले उचित समय हुने जानकारहरु बताउँछन् ।  

नेप्सेमा सूचीकृत रहेका कम्पनीहरुमध्ये अहिले बजारमा तीन दर्जन कम्पनीका सेयर सस्तोमै खरिद गर्न सकिन्छ । नेप्से परिसूचक २६ सयको विन्दुमा कायम हुँदा अहिले सस्ता सेयरभाउ भएका कम्पनी उठाएर राख्दा पछि उत्कृष्ट रिटर्न पाउन सकिने जानकारहरु दाबी गर्छन् ।  

सूचीकृत कम्पनीहरुमध्ये अधिकांश वाणिज्य बैंक र हाइड्रोपावर कम्पनीका सेयरभाउ सस्तोमै पाइन्छन् । यतिबेला लाभांश सिजन पनि सुरु भएकाले अहिले सस्ता कम्पनीहरु खरिद गर्न उपयुक्त समय हुन सक्छ ।  

बैंक तथा हाइड्रो कम्पनीहरुले लाभांश घोषणा गर्न थालेका छन् । सूचीकृत कम्पनीको तुलनामा हाइड्रो कम्पनीहरुले लाभांश वितरण कमै गरेतापनि यतिबेला हाइड्रो कम्पनीहरुले हकप्रद सेयर निष्कासन गर्न थालेका छन् । लगानीकर्ताहरुले हकप्रदमार्फत पनि रिटर्न प्राप्त गर्न सक्नेछन् ।  

वाणिज्य बैंकहरुले प्रत्येक आर्थिक वर्षमा आर्जित मुनाफाबाट वितरणयोग्य मुनाफा छुट्याई लगानीकर्तालाई केही प्रतिशत भएपनि प्रतिफल बाँडेका हुन्छन् । सूचीकृत कम्पनीहरुको तुलनामा लगानीकर्तालाई निरन्तर प्रतिफल अर्थात् लाभांश बाँड्ने भनेकै वाणिज्य बैंकहरु हुन् । लगानीकर्ताहरुले सेयरभाउ बढोत्तरीबाट नाफा बुक गर्न नसकेपनि बैंकहरुले वितरण गरेको लाभांशबाट रिटर्न प्राप्त गर्न सक्नेछन् ।  

बजारमा अहिले ११ वटा वाणिज्य बैंकको सेयरभाउ सस्तोमै पाइन्छ । ३ सय भन्दा कम सेयरभाउ रहेका वाणिज्य बैंकहरुमध्ये हालसम्म सिटिजन्स बैंकले मात्रै लाभांश घोषणा गरेको भने अन्य बैंकले लाभांश प्रस्ताव गर्न बाँकी नै छ । यसकारण सस्ता सेयरभाउ रहेका वाणिज्य बैंकहरुको सेयर खरिद गर्दा लङ टर्मका लागि लगानीकर्ताले लाभांशबाटै रिटर्न पाउन सक्नेछन् ।  

त्यस्तै, २२ वटा हाइड्रो कम्पनीको सेयरभाउ पनि ३ सय रुपैयाँभन्दा कम छ । तुलनात्मक रुपमा हाइड्रो कम्पनीहरुले थोरै लाभांश दिएपनि सर्ट टर्मका लागि हाइड्रो कम्पनी नै लगानीका लागि उपयुक्त हुन सक्ने लगानीकर्ताहरु बताउँछन् । नेप्सेमा सूचीकृत समूहमध्ये हाइड्रोपावर समूहमा धेरै कम्पनी रहेकाले पनि अल्पकालिन लगानीका लागि अधिकांश लगानीकर्ताले हाइड्रो कम्पनी नै छान्ने गरेको पाइन्छ ।  

यतिबेला हाइड्रोपावर कम्पनीहरुले हकप्रद निष्कासन गर्न लागेका छन् । यसबाट पनि लगानीकर्ताले रिटर्न पाउन सक्नेछन् ।