दुईदिन पछि घट्यो सेयरबजार, जानकार भन्छन्, ‘बढ्ने वातावरण बन्दैछ’

काठमाण्डौ । लागातार दुईदिन बढेको सेयरबजारमा आज गिरावट आएको छ । साताको चौथो कारोबार दिन आज नेपाल स्टक एक्सचेञ्च(नेप्से) परिसूचक ०.५० प्रतिशत अर्थात १३.३५ अंकले घटेर २ हजार ६३५.९४ विन्दुमा सीमित भएको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.४८ प्रतिशतले घटेर ४५५.०१ विन्दुमा झरेको छ । यो दिन नेप्सेमा सूचीकृत मध्ये ३२३ वटा स्क्रिप्टको १ करोड ६ लाख ३३ हजार ७१७ कित्ता सेयर ५ अर्ब १७ करोड ५० लाख रुपैयाँभन्दा बढीको कारोबार भएको छ । आजको कारोबार अघिल्लो दिनको तुलनामा कम हो । अघिल्लो दिन भने ७ अर्ब १२ करोड रुपैयाँभन्दा बढीको कारोबार भएको थियो ।

आजको बजारबारे बजार जानकार प्रकाश रजौरे भन्छन्, ‘आजको बजार घट्नुको मुख्य कारण भनेको ट्रेडरहरुको नाफा बुक मान्न सकिन्छ । पछिल्लो समय बजारमा ट्रेडर हाबी भएका कारण ५÷१० प्रतिशतको ग्रोथ हुने बित्तिकै सेयर बिक्री गर्ने प्रवृत्ति छ । आजको घटाई पनि दुई दिन लगातार बढेको बजारबाट नाफा बुक गरेको बुझ्न सकिन्छ । साथै भोल्युम पनि घटेको अवस्थाले लगानीकर्ताहरुमा फेरी मनोबल खस्किएको हो कि भन्ने जनाउँछ । तर बजार विस्तारै बढ्ने सम्भावना भने छ । अहिले दीर्घकालिन लगानीकर्ताहरु बजार छिरिसकेका छन् तर फन्डामेन्टल रुपमा बलिया कम्पनीहरुमा लगानी गर्न पर्ख र हेरको अवस्थामा छन् । दीर्घकालिन लगानीकर्ताहरुको इन्ट्रि भएपछि एग्रेसिभ रुपमा लागिपरेका भने छैनन् । अहिले केही हदसम्म पुस मसान्तको पनि दबाबले बजार बढ्न नसकेको हो । बजारको लागि नेपाल राष्ट्र बैंक पनि सकारात्मक छ । यसकारण पुष मसान्तपछि विस्तारै माथि जान्छ । अहिले बजार बढ्ने जस्तो नदेखिएपनि बढ्का लागि वातावरण भने बनिसकेको अवस्था छ ।’

यो दिन नेप्सेमा सूचीकृत १३ वटा समूहमध्ये दुईवटा बाहेक अन्य सबैमा रातो पोतियो । आज फाइनान्स र व्यापार समूह मात्रै बढे । फाइनान्स समूह ०.२१ प्रतिशत र व्यापार समूह ०.२४ अंकले बढ्यो ।

होटल समूह आज सर्वाधिक घट्यो । यो समूहमा आज १.४२ प्रतिशतको गिारवट आयो । बैंकिङ समूह पनि आज ०.२४ प्रतिशत, विकास बैंक ०.८४, हाईड्रो ०.७९, लगानी ०.५४, जीवन बीमा ०.०७, एतmपादन तथा प्रशोधन १.१६, लघुवित्त ०.४०, म्युचुअल फण्ड ०.२९, निर्जीवन बीमा ०.६० र अन्य समूह ०.५३ प्रतिशतले घट्यो ।

धेरै कारोबार गर्ने कम्पनीहरु

आज एसवाई प्यानलको सर्वाधिक सेयर कारोबार भयो । आज यो कम्पनीको २६ करोड ९४ लाख बढीको सेयर कारोबार भयो ।

यस्तै, श्रीनगर एग्रीटेकको २३ करोड ५५ लाख, मन्जुश्री फाइनान्सको २० करोड ४७ लाख, शिवम् सिमेन्टको १६ करोड १० लाख र सागर डिस्टिलरीको १५ करोड ६८ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागने। आज नारायणी डेभलपमेन्ट बैंकको सेयरमूल्य सर्वाधिक अर्थात ६.०८ प्रतिशतले बढ्यो ।

यस्तै फर्स्ट माइक्रोफाइनान्सको ३.३५, शुभम् पावरको २.६७ र सयपत्री हाईड्रोको सेयरमूल्य २.६३ प्रतिशतले बढ्यो ।

यो दिन एसवाई प्यानलको सेयरमूल्य सर्वाधिक अर्थात ८.४५ प्रतिशतले घट्यो। जीवन विकास लघुवित्तको सेयरमूल्य पनि आज ६.५९ र विन नेपाल लघुवित्तको सेयरमूल्य ५.५३ प्रतिशतले घट्यो ।