कुवेतमा खस्यो अमेरिकी लडाकु विमान, अमेरिकी दूतावासद्वारा सुरक्षित बस्न आग्रह

काठमाण्डौ । कुवेतको रक्षा मन्त्रालयले आइतबार बिहान केही अमेरिकी लडाकु विमान जमिनमा खसेको जानकारी दिएको छ। मन्त्रालयका अनुसार उक्त घटनामा संलग्न चालकदल सुरक्षित रहेका छन्। उनीहरूलाई स्वास्थ्य परीक्षणका लागि अस्पताल लगिएको र उनीहरूको अवस्था स्थिर रहेको बताइएको छ।

कुवेत सरकारले घटनाका सम्बन्धमा आफ्नो अमेरिकी सहयोगीसँग समन्वय र छलफल गरिरहेको जनाएको छ। साथै, दुर्घटनाको कारणबारे अनुसन्धान जारी रहेको मन्त्रालयले स्पष्ट पारेको छ।

 

यसैबीच, शनिबार अमेरिका र इसराइलले इरानमाथि आक्रमण गरेका थिए। आइतबार इरानका सर्वोच्च नेता आयातोल्लाह अली खामेनेई इसराइल र अमेरिकाको हमलामा मारिएको खबर सार्वजनिक भएको छ।

यस्तै कुवेतमा रहेको अमेरिकी दूतावासले जनतालाई दूतावास नजान र आफ्नो घरभित्र सुरक्षित बस्न अनुरोध गरेको छ। स्थानीय र अन्तर्राष्ट्रिय रिपोर्ट अनुसार, सोमबार दूतावास नजिकै धुवाँ उठेको देखिएपछि सुरक्षा चेतावनी जारी गरिएको हो। अमेरिकी नागरिकहरूलाई घरभित्र, तलतिरको तल्लामा, झ्यालबाट टाढा रहन र बाहिर ननिस्कन सल्लाह दिइएको छ।