६ हजार ५४१ उम्मेदवारको भविष्य मतपेटीकामा कैद गर्दै सकियो मतदान

काठमाण्डौ। बिहीबार बिहान ७ बजे सुरु भएको प्रतिनिधि सभा निर्वाचन–२०८२ को मतदान अपराह्न ५ बजेसम्म सम्पन्न भएको छ। निर्वाचन आयोगले ५ बजेसम्म मतदान केन्द्रमा पुगेका मतदाताले आफ्नो मत हाल्न पाउने जनाएको छ। मतदान लाइनमा समयमै नपुगेकाले मतदाता अवसर गुमाउनेछन्।

यो निर्वाचन प्रत्यक्ष प्रणालीमा १६५ र समानुपातिक प्रणालीमा ११० सिटका लागि भएको हो। देशभर ६ हजार ५४१ उम्मेदवार प्रतिस्पर्धामा छन्। प्रत्यक्षतर्फ तीन हजार ४०६ उम्मेदवार छन्, जसमा पुरुष ३ हजार १७, महिला ३८८ र अन्य १ छन्। समानुपातिकतर्फ ३ हजार १३५ उम्मेदवार छन्, जसमा पुरुष १ हजार ३६३ र महिला १ हजार ७७२ छन्।

मतदाता संख्या कुल १ करोड ८९ लाख ३ हजार ६८९ रहेको छ, जसमा पुरुष ९६ लाख ६३ हजार ३५८, महिला ९२ लाख ४० हजार १३१ र अन्य २०० रहेका छन्। प्रारम्भिक तथ्यांक अनुसार ५० प्रतिशतभन्दा बढी मतदाताले मतदान गरेका छन्।

देशभर १० हजार ९६७ स्थायी मतदानस्थल, २३ हजार ११२ मतदान केन्द्र र १४३ अस्थायी मतदानस्थल सञ्चालनमा राखिएका थिए। ज्येष्ठ नागरिक, अपाङ्गता भएका व्यक्ति, अशक्त र गर्भवती महिलालाई प्राथमिकता दिइएको छ।

निर्वाचनको सुरक्षा उच्च स्तरमा राख्न ७९ हजार ७२७ नेपाली सेना, ७५ हजार ७९७ नेपाल प्रहरी, ३४ हजार ५६७ सशस्त्र प्रहरी, १ हजार ९२१ राष्ट्रिय अनुसन्धान र १ लाख ४९ हजार ९० निर्वाचन प्रहरी खटाइएका थिए। यसबाहेक २ लाख १५ हजार कर्मचारी निर्वाचन कार्यमा संलग्न थिए। आयोगले निर्वाचन शान्तिपूर्ण सम्पन्न भएको र केवल केही छिटपुट घटना बाहेक समस्या नभएको जनाएको छ।