सेयर लगानीकर्तामा अभूतपूर्व उत्साह, 'नयाँ सरकार गठनपछि बजारले दिगो लय समात्छ'

काठमाण्डौ । साताको अन्तिम कारोबार दिन बिहीबार नेपाल स्टक एक्सचेञ्ज-नेप्से)मा उछाल आएको छ ।  

उच्च अंकले बढेको  नेप्सेमा कारोबारमा समेत उस्तै उछाल देखिएको छ । सूचक-इण्डेक्स) र कारोबार-टर्नओभर) समानान्तर ढंगले बढ्न थालेको देखिन्छ, जुन बजारको दिगो बढोत्तरीका लागि सकारात्मक पक्ष हो ।  

नेप्से परिसूचक बजार खुलेदेखि नै उकालो लाग्न सुरु गरेको थियो । सूचकसँगै कारोबार रकममा पनि सुरुवातदेखि नै उछाल देखिएको थियो ।  

नेप्से परिसूचक २ः२८ बजे २८८२ अंक माथि पुगे पनि बन्द हुने बेलामा केही करेक्सन भई ६४.६७ अंकको उछालसहित २८७७ अंकमा समेटिएको हो ।  

यो दिन बजारमा २१ अर्ब २२ करोड बढीको सेयर किनबेच भएको छ । २६३ कम्पनीको सेयर कारोबारमा आएकोमा २४० वटाको मूल्य बढेको छ भने २२ वटाको घट्दा २ वटाको मूल्य स्थिर देखिएको छ । 

यो दिन बजारमा कुल १ लाख ९१ हजार २५१ वटा कारोबार भएका छन् ।  ५ करोड ६९ लाख २० हजार ६०८ कित्ता सेयर किनबेच भयो ।  

नेपाल इन्भेष्टर्स फोरमका अध्यक्ष तुलसीराम ढकालको भनाईमा दुई तिहाई बहुमत नजिक जनमतप्राप्त सरकार गठन हुनै लाग्दा बजारमा नयाँ तरंग थपिएको छ । विशेषगरी नीतिमा हुने अस्थिरता अब हट्ने देखिएपछि लगानीकर्ताहरुमा मनोबल उच्च भएको उल्लेख गर्दै उनले भने -'यसअघि सेयरबजार आफ्नै गतिमा थियो । राजनीतिक विषयले सेयरबजारलाई प्रत्यक्ष असर पार्ने हुँदा अस्थिर राजनीतिका कारण नेप्से तल्लो विन्दुमा पुगेको थियो, त्यसमाथि जेनजी आन्दोलनले बजारलाई झनै प्रतिकुल असर नै पारेको थियो । अब नयाँ सरकार बन्नका लागि आजदेखि निर्वाचन आयोगले बाटो खुलाईदिएको छ, जसकारण लगानीकर्ताहरु उत्साहित छन् । यतिबेला लगानीका अन्य सेक्टरहरु खासै नचलेका कारण सेयरबजार नै लगानीको लागि उपयुक्त क्षेत्र पनि भएको छ । जसकारण पछिल्लो केही दिनयता सेयरबजारमा उच्च कारोबार भएको देख्न सकिन्छ ।'  

उनले बैंकहरुमा पैसा प्रशस्त भएका कारण त्यो पैसा पनि बिस्तारै बजारमै आउन थालेको दाबी गरे । अब नयाँ सरकार गठन भएपछि बजारले पूर्ण रुपमा लय लिनसक्ने उनको विश्लेषण छ ।  

कुन समूह कति बढ्यो ?

यो दिन सेन्सेटिभ इण्डेक्स २.४० प्रतिशत, फ्लोट इण्डेक्स २.५० तथा सेन्सेटिभ फ्लोट इण्डेक्स २.५१ प्रतिशतले वृद्धि भएको छ । 

सबैभन्दा बढी विकास बैंक समूहमा बढोत्तरी देखिएको छ । यो समूहको सूचक करिब ४ प्रतिशतले बढेको छ ।  

यस्तै, वाणिज्य बैंकहरुको सूचक समेत ३.१६ प्रतिशतले वृद्धि भएको छ ।  

जीवन बीमा समूहको सूचक करिब ३ प्रतिशतले बढ्दा जलविद्युत समूहमा २.२९ प्रतिशतको बढोत्तरी देखिएको छ ।  

बजारमा आज वित्त समूह, होटल तथा पर्यटन, इन्भेष्टमेन्ट, उत्पादन तथा प्रशोधन, निर्जीवन बीमा र अन्य समूहको सूचक २ प्रतिशत हाराहारीले वृद्धि भएका छन् ।  

माइक्रोफाइनान्समा १.२४ प्रतिशत, म्युचुअल फण्डमा ०.०४ प्रतिशत र व्यापार समूहमा ०.१६ प्रतिशतको वृद्धि देखिएको छ ।

धेरै कारोबार गर्ने कम्पनी

यो दिन धेरै कारोबार गर्ने मुख्य ५ कम्पनीको सूचि जलविद्युत समूहले कब्जा गरेको छ । सबैभन्दा बढी ङादी ग्रुप पावर लिमीटेडले ६७ करोड बढीको कारोबार गरेको छ ।  

त्यसपछि क्रमशः नेशनल हाइडोपावर कम्पनीले ६६ करोड ९० लाख, रिडी पावरले ६२ करोड ६० लाख, आँखखोला जलविद्युत कम्पनीले ५९ करोड ५७ लाख र अपर तामाकोशीले ५९ करोड ३३ लाख बढीको कारोबार गरेका छन् ।  

यो दिन कुमारी बैंकको साढे ५४ करोड हाराहारीको सेयर किनबेच भएको छ भने अपी पावरले ५३ करोड ३८ लाख, अरुण काबेली पावरले ५३ करोड, हिमाल दोलखा हाइडोपावरले ४७ करोड र एनआरएन इन्फ्रास्टक्चर एण्ड डेभलपमेन्ट कम्पनीले ४७ करोड बढीको कारोबार गरेका छन् ।  

धेरै कमाउने र गुमाउने कम्पनी

यो दिन धेरै मूल्य बढेका मुख्य १० कम्पनीको सूचि मिश्रित बनेको छ । कर्पोरेट डेभलपमेन्ट बैंक, साल्पा विकास बैंक, रिलायन्स स्पिनिंग मिल्स, सोलु हाइडोपावर र होटल फरेस्ट इन लिमीटेडको सेयरमूल्यमा अपर सर्किट लागेको छ । यी ५ कम्पनीमध्ये कर्पोरेट डेभलपमेन्ट बैंक मात्र पुरानो कम्पनी हो, बाँक ४ कम्पनी हालसालै दोश्रो बजारमा सूचिकृत भएका हुन् ।  

यो दिन साञ्जेन जलविद्युत कम्पनीको मूल्यमा ८ प्रतिशतको बढोत्तरी भएको छ भने अपर तामाकोशीको मूलय ७.५३ प्रतिशत, एनआईसी एशिया बैंकको मूल्य ६.०९ प्रतिशत, सिटिजन्स बैंकको मूल्य ५.८३ प्रतिशत र माछापुच्छ्र बैंकको मूल्य ५.५८ प्रतिशतले वृद्धि भएको छ ।