समस्याग्रस्त सहकारीका बचतकर्ताको रकम फिर्ता सुरु, पहिलो दिन ३७८ जनालाई दिइयो

काठमाण्डौ । लामो समयदेखि रोकिएको समस्याग्रस्त सहकारीका बचत फिर्ता प्रक्रिया सरकारले औपचारिक रूपमा सुरु गरेको छ। प्रारम्भिक चरणमा तीन वटा सहकारीका साना बचतकर्तालाई लक्षित गर्दै रकम फिर्ता गरिएको छ।

समस्याग्रस्त सहकारी व्यवस्थापन समितिका अनुसार पहिलो दिन कुल ३७८ जना बचतकर्तालाई रकम भुक्तानी गरिएको हो। तीमध्ये कान्तिपुर सहकारीका २१५ जना, शिव शिखर बहुउद्देश्यीय सहकारीका १५६ जना तथा पशुपति सहकारीका ७ जना बचतकर्ता समावेश छन्।

समितिले प्रारम्भिक चरणमा थोरै बचत भएका सदस्यलाई प्राथमिकता दिँदै भुक्तानी प्रक्रिया अघि बढाएको जनाएको छ। अब भने बचतकर्ताको रकमको आकारका आधारमा क्रमशः वर्गीकरण गरी फिर्ता गर्ने रणनीति अपनाइनेछ।

सरकारी तथ्याङ्कअनुसार समस्याग्रस्त सहकारीमा करिब ७६ हजार बचतकर्ताको झन्डै ४६ अर्ब रुपैयाँ फिर्ता गर्न बाँकी छ। तीमध्ये ठूलो हिस्सा साना बचतकर्ताको रहेको समितिले जनाएको छ। ५ लाख रुपैयाँभन्दा कम बचत गर्नेहरूलाई साना बचतकर्ता र सोभन्दा बढी बचत गर्ने करिब १८ हजार जनालाई ठूला बचतकर्ताको रूपमा वर्गीकरण गरिएको छ।

सरकारले सहकारी संकट समाधानका लागि ऋण असुलीलाई पनि समानान्तर रूपमा अघि बढाइरहेको छ। भूमि व्यवस्था, सहकारी तथा गरिबी निवारण मन्त्रालयका अनुसार ऋणीहरूबाट हालसम्म २ करोड रुपैयाँभन्दा बढी असुल भइसकेको छ।