२७ सय विन्दूबाट तल झर्यो नेप्से, जानकार भन्छन्, ‘असार मसान्तको दबाब पनि देखिन थाल्यो’

काठमाण्डौ । मंगलबार सेयरबजार दोहोरो अंकले घटेको छ। आज नेपाल स्टक एक्सचेञ्ज (नेप्से)परिसूचक ०.९६ प्रतिशत अर्थात २६.१६ अंकले घटेर २ हजार ६७४.४८ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.५० प्रतिशतले घटेर ४६१.४८ विन्दुमा झरेको छ।

आज नेप्सेमा सूचीकृत ३५३ वटा स्क्रिप्टको १ करोड लाख ४० हजार १६४ कित्ता सेयर किनबेच हुँदा कुल कारोबार रकम ४ अर्ब ३६ करोड २१ लाख बढीको सेयर कारोबार भएको छ । अघिल्लो दिन भने ४ अर्ब ४४ करोड ६५ लाख बढीको सेयर कारोबार भएको थियो।

आजको बजारबारे बजार जानकार दामोदर गजुरेल भन्छन्, ‘बजार चलायमान हुन लगानीकर्ताको सेन्टिमेन्ट कस्तो छ त्यसमा भर पर्छ । अहिलेको बजार लगानी गर्न कति सेक्युअर छ, त्यसमा बजारको अवस्था निर्धारण हुन्छ । नेपाल धितोपत्र बोर्डमा अध्यक्ष आएपनि लगानीकर्ताहरु अहिले बजारमा लगानी गर्न उत्साहित छैनन् । ठूला लगानीकर्ता, व्यवसायीहरु अहिले त्रसित जस्तै छन् र लगानी गर्नका लागि पर्ख र हेरको अवस्थमा छन् ।’

उनले थपे, ‘मुख्यतः सरकारले लगानीकर्ताको मनोबल उकास्न सकेन । बजेट भाषणमा एकथरी कुरा र विधेयकमा अर्कोथरी कुरा आउँदा लगानीकर्ताले यो सरकारलाई विश्वास गर्न नसकेको होकी जस्तो पनि देखिएको छ । साथै अब असार मसान्तको दबाब पनि बजारमा देखिन थालेको छ । बैंकहरुसँगको हिसाब मिलान गर्न लगानीकर्ताहरुले सेयर पनि बेचेका हुन सक्छन् । लगानीकर्ताहरु अबको मौद्रिक नीतिमा पूँजीबजारका लागि के–कस्ता नीतिहरु आउँछन् भन्ने आतुरमा छन् ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये एउटामा हरियाली छायो भने अन्य सबैमा रातो पोतियो । आज म्युचुअल समूह मात्रै बढ्यो । यो समूह आज ०.४५ प्रतिशतले बढ्यो ।

यो दिन उत्पादन तथा प्रशोधन समूह सर्वाधिक अर्थात १.९२ प्रतिशतले घट्यो । यस्तै बैंकिङ समूह ०.२९ प्रतिशत, विकास बैंक ०.४३, फाइनान्स १.२८, होटल १.११, हाईड्रो १.६३, लगानी १.०३, जीवन बीमा ०.८५, निर्जीवन बीमा १.०१, अन्य समूह ०.६७ प्रतिशत र व्यापार १.५७ प्रतिशतले घट्यो ।

सर्वाधिक कारोबार हुने कम्पनी

आज आँखुखोला जलविद्युतको सर्वाधिक सेयर कारोबार भयो । यो कम्पनीको आज ३४ करोड १६ लाख बढीको सेयर कारोबार भयो । यस्तै सोपान फर्मास्युटिकल्सको १८ करोड ९० लाख, रिलायन्स स्पीनिङ मिल्सको १७ करोड २४ लाख , एनआरएन इन्फ्रास्ट्रक्चरको १७ करोड २३ लाख र बुङ्गल हाईड्रोको १३ करोड १२ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये दुईवटा कम्पनीको सेयरमूल्यमा मात्रै अपर सर्किट लाग्यो। आज टक्सार पिखुवाखोला र याम्बालिङ हाईड्रोपावरको सेयरमूल्यमा मात्रै अपर सर्किट लाग्यो ।

यस्तै लक्ष्मी उन्नती कोषको मूल्य ५.९८ प्रतिशत, सिद्धार्थ इन्भेष्टमेन्ट ग्रोथ स्किमको ५.४१ र एनआईबीएल स्टेबल फण्डको मूल्य ३.८० प्रतिशतले बढ्यो ।

यो दिन बुङ्गल हाईड्रोको सेयरमूल्य सर्वाधिक अर्थात १५ प्रतिशतले घटेर लोवर सर्किट लाग्यो । एपोलो हाईड्रोको सेयरमूल्य पनि आज ११.१२ प्रतिशत र सोपान फर्मास्युटिकल्सको सेयरमूल्य ७.०५ प्रतिशतले ओरालो लाग्यो ।