लघुबीमकहरुको व्यवसाय ५५८.६२% ले बढ्यो, सूचीकृत कम्पनीको कस्तो छ प्रदर्शन ?

काठमाण्डौ । लघुबीमा कम्पनीहरुले चालु आर्थिक वर्षको तेस्रो त्रैमाससम्म साढे एक अर्ब रुपैयाँ बीमाशुल्क संकलन गरेका छन् । नेपाल बीमा प्राधिकरणका अनुसार तीन जीवन लघुबीमक र चार निर्जीवन लघुबीमक गरी कुल ७ लघुबीमा कम्पनीले १ अर्ब ५४ करोड २४ लाख रुपैयाँ बीमाशुल्क संकलन गरेका हुन् ।  

यो बीमाशुल्क गत आवको सोही अवधिसम्मको तुलनामा ५५८.६२ प्रतिशत बढी हो । गत आवको तेस्रो त्रैमाससम्म लघुबीमा कम्पनीहरुले २३ करोड ४१ लाख रुपैयाँ मात्रै बीमाशुल्क संकलन गरेका थिए ।  

लघुबीमा कम्पनीहरुले पछिल्लो एक वर्षयता आफ्नो शाखा सञ्जाल र कर्मचारी संख्या बढाएर व्यवसाय पनि उल्लेख्य बृद्धि गर्न सफल भएको छ । नेपाल बीमा प्राधिकरणको निर्देशन बमोजिम लघुबीमा कम्पनीहरुले ग्रामिण क्षेत्र तथा स्थानीय निकायहरुसँगको सहकार्यमा लघुबीमा सेवा उपलब्ध गराउँदै आइरहेका छन् ।  

लघु जीवन बीमातर्फ गार्डियन माइक्रो लाइफले ३२ करोड ५८ लाख, क्रेष्ट माइक्रो लाइफले ३२ करोड २० लाख र लिबर्टी माइक्रो लाइफले २० करोड ७७ लाख रुपैयाँ प्रिमियम संकलन गरेका छन् ।

त्यस्तै, लघु निर्जीवन बीमार्फत नेपाल माइक्रो इन्स्योरेन्सले १९ करोड ३६ लाख, प्रोटेक्टिभ माइक्रो इन्स्योरेन्सले १७ करोड ५७ लाख, स्टार माइक्रो इन्स्योरेन्सले १६ करोड ३२ लाख र ट्रष्ट माइक्रो इन्स्योरेन्सले १५ करोड ४० लाख रुपैयाँ प्रिमियम संकलन गरेका छन् ।  

जीवन बीमातर्फ सबैभन्दा बढी व्यवसाय बढाउनेमा लिबर्टी माइक्रो लाइफले १९३४.५३ प्रतिशत र निर्जीवन लघुबीमा तर्फ ट्रष्ट माइक्रो इन्स्योरेन्सले २३२४.७७ प्रतिशतले व्यवसाय बढाएको छ ।  

हाल नेपाल स्टक एक्सचेञ्ज (नेप्से)मा तीनवटा लघुबीमा कम्पनी सूचीकृत छन् । गार्डियन माइक्रो लाइफ, क्रेष्ट माइक्रो लाइफ र नेपाल माइक्रो इन्स्योरेन्स दोस्रो बजारमामा सूचीकृत कम्पनी हुन् ।  

गार्डियन माइक्रो लाइफको व्यवसाय १४९०.५२ प्रतिशत, क्रेष्ट माइक्रो लाइफको ५६८.८८ प्रतिशत र नेपाल माइक्रो इन्स्योरेन्सको १९२.३४ प्रतिशत बढेको छ ।  

ट्रष्ट माइक्रो इन्स्योरेन्स बाहेक स्टार माइक्रो, प्रोटेक्टिभ माइक्रो र लिबर्टी माइक्रो लाइफ इन्स्योरेन्सले भने आइपीओ जारी गर्न नेपाल धितोपत्र बोर्डसँग अनुमति मागेको छ ।