अमेरिकाले हर्मुज जलमार्गमा फसेका जहाजको उद्धार गर्ने, हस्तक्षेप भए कडा जवाफ दिने चेतावनी

काठमाण्डौ । अमेरिकी राष्ट्रपति डोनाल्ड ट्रम्पले अमेरिकी नौसेनाले हर्मुज जलमार्गमा फसेका विदेशी जहाजहरूलाई सुरक्षित रूपमा बाहिर निकाल्ने अभियान सुरु गर्ने घोषणा गरेका छन्। उक्त अभियान सोमबार बिहानदेखि लागू हुने बताइएको छ।

ट्रम्पले आफ्नो सामाजिक सञ्जाल प्लेटफर्म ट्रुथ सोसलमार्फत ‘प्रोजेक्ट फ्रीडम’ नामक पहलको घोषणा गर्दै मध्य पूर्वको द्वन्द्वसँग सम्बन्ध नरहेका देशहरूको अनुरोधमा यस्तो कदम चालिएको उल्लेख गरेका छन्। उनका अनुसार, विभिन्न देशहरूले आफ्ना जहाज र चालकदलको सुरक्षाका लागि सहयोग मागेका छन्।

‘हामी ती देशहरूलाई सहयोग गर्नेछौं जसको चलिरहेको द्वन्द्वसँग प्रत्यक्ष सम्बन्ध छैन, ताकि उनीहरूले आफ्नो व्यापारिक गतिविधि सुरक्षित रूपमा निरन्तरता दिन सकून्,’ ट्रम्पले लेखेका छन्।

उनले जहाजहरूमा खाना, पानी तथा अन्य अत्यावश्यक सामग्रीको अभाव हुन थालेको जनाउँदै चालकदलको सुरक्षामा जोखिम बढेको बताएका छन्। यस सन्दर्भमा मानवीय आधारमा उद्धार अभियान सुरु गरिएको उनको भनाइ छ।

यद्यपि, ट्रम्पले उक्त अभियानमा कुनै पनि प्रकारको अवरोध वा हस्तक्षेप भए कडा जवाफ दिइने चेतावनी पनि दिएका छन्।

स्ट्रेट अफ हर्मुज विश्वकै अत्यन्त संवेदनशील समुद्री मार्गमध्ये एक मानिन्छ, जहाँबाट विश्वको करिब २० प्रतिशत तेल तथा ग्यास आपूर्ति हुने गर्दछ। पछिल्लो समय मध्य पूर्वमा बढ्दो द्वन्द्वका कारण यस क्षेत्रमा आवागमन प्रभावित भएको छ।