टेस्लाको साइबरट्रकमा आगलागी, चालकको निधन

काठमाण्डौ । टेस्लाको साइबर ट्रकमा आगलागी भएर एक जना व्यक्तिको निधन भएको छ । यो घटना बुधबार अमेरिकाको लस भिगासमा रहेको ट्रम्प इन्टरनेशनल होटल बाहिर भएको हो ।  

साइबर ट्रकमा भएको आगलागीमा चालकको मृत्यु भएको छ भने अन्य ७ जना घाइते भएका छन् । कारमा आगलागी हुनुको कारण बारे एफबीआईले अनुसन्धान गरिरहेको छ । एफबीआईले आतंककारी हमलाका कारण घटना घटेको सम्भावनाको कोणबाट समेत अनुसन्धान गरिरहेको जनाइएको छ ।  

एलन मस्कले यो घटना साइबर ट्रकमा देखिएको प्राविधिक समस्याका कारण नभएको बताएका छन् । मस्कले यो घटना विस्फोटक पदार्थ वा बमका कारण भएको हुनसक्ने भन्दै एक्समा पोष्ट गरेका छन् ।  

प्रत्यक्षदर्शीले खिचेको भिडियोमा होटल बाहिर रहेको कारमा विस्फोटका साथ आगलागी भएको देखिएको छ । नयाँ वर्षको दिन भिडभाड भएको ठाउँमा ट्रक कुदाएर १५ जनाको मृत्यु भएको एक दिन नबित्दै यो घटना घटेको हो ।