धनुषामा रास्वपाको जित खेर गयो, सर्वोच्चले अन्तरिम आदेश दिएन

काठमाण्डौ । धनुषा क्षेत्र नम्बर १ मा राष्ट्रिय स्वतन्त्र पार्टी (रास्वपा) का उम्मेदवार किशोरी साहलाई प्रत्यक्षतर्फ प्राप्त भएको बहुमत अन्ततः खेर गएको छ। सर्वोच्च अदालतले साहको उम्मेदवारी खारेज गर्ने निर्वाचन आयोगको निर्णयलाई तत्काल रोक्न अस्वीकार गरेपछि रास्वपाले जितेको मानिएको सिट पनि गुमेको हो।

उम्मेदवारी कायम गराइदिन माग गर्दै साहले निर्वाचन आयोगको निर्णय खारेज गर्न अन्तरिम आदेश मागसहित सर्वोच्च अदालतमा निवेदन दिएका थिए। तर न्यायाधीशद्वय विनोद शर्मा र मेघराज पोखरेलको इजलासले अन्तरिम आदेश दिन आवश्यक नदेखिएको भन्दै निवेदन अस्वीकार गरेको छ।

सर्वोच्चको यस आदेशसँगै निर्वाचन आयोगको निर्णय यथावत रहेको छ। त्यसका कारण धनुषा–१ मा निर्वाचन अधिकृतको कार्यालयले मात्रिका यादव निर्वाचित भएको भनी गरेको निर्णय पनि कायम रहने भएको छ।

यस घटनासँगै धनुषामा प्रत्यक्षतर्फ रास्वपा उम्मेदवारले प्राप्त गरेको बहुमतको मत परिणाममा परिणत हुन सकेन। फलस्वरूप रास्वपाले प्रतिनिधिसभामा थपिने भनिएको एक सिट पनि गुमाएको छ।