बढ्यो पेट्रोलियम पदार्थको मूल्य, मुद्रास्फिति बढ्नसक्ने जोखिम

काठमाण्डौ । पेट्रोलियम पदार्थको मूल्य पुनः बढाइएको छ ।  

नेपाल आयल निगमले एक विज्ञप्ति जारी गर्दै आज राति १२ बजेदेखि लागू हुने गरी पेट्रोलियम पदार्थको मूल्य बढाइएको जानकारी दिएको हो ।  

इण्डियन आयल कर्पोरेसनबाट पेट्रोलियम पदार्थको मूल्य बढेर आएकोले घरेलु बजारमा पनि मूल्य समायोजन गर्नुपरेको निगमको प्रष्टोक्ति छ । 

निगमकाअनुसार पेट्रोलमा २, डिजेल र मट्टितेलमा ४ रुपैयाँले मूल्य बढाइएको छ भने हवाई इन्धनमा आन्तरिकतर्फ प्रतिलिटर ६ रुपैयाँ तथा अन्तर्राष्ट्रियतर्फ काठमाडौंका लागि अमेरिकी डलर ४३ का दरले मूल्यवृद्धि भएको छ ।

समायोजनपछि पेट्रोलको मूल्य अब काठमाडौं, पोखरा र दिपायल क्षेत्रमा लिटरको १६७ रुपैयाँ, सुर्खेत र दाङ क्षेत्रमा १६६ र अरु क्षेत्रमा १६४ रुपैयाँ ५० पैसा कायम भएको छ । 

यसैगरी, डिजेल र मट्टीतेलको मूल्य काठमाडौं, पोखरा र दिपायल क्षेत्रमा प्रतिलिटर १६० रुपैयाँ तथा सुर्खेत र दाङ क्षेत्रमा १५९ र अरु क्षेत्रमा १५७ रुपैयाँ ५० पैसा कायम भएको छ ।  

पेट्रोलियम पदार्थको मूल्य लगातार बढ्दा ढुवानी खर्च वृद्धि हुन गई उपभोग्य सामानको मूल्यवृद्धि हुन्छ । यस्तै, सार्वजनिक यातायातको भाडादर समेत बढ्न गई त्यसले मुद्रास्फितिलाई बढाउन थप सहयोग गर्छ ।