चर्कियो व्यापार-युद्ध: चीनले अमेरिकी वस्तुहरूमा ३४% महसुल लगाउने घोषणा

काठमाण्डौ । चीनले शुक्रबार घोषणा गर्‍यो कि उसले अप्रिल १० देखि लागू हुनेगरी अमेरिकाबाट आयात गरिने सम्पूर्ण वस्तुहरूमा ३४% प्रतिशोधात्मक महसुल (ट्यारिफ) लगाउनेछ।  

अमेरिकी राष्ट्रपति डोनाल्ड ट्रम्पले विश्वव्यापी व्यापार युद्धलाई थप चर्काउँदै कदम चालेपछि चीनले त्यसको जवाफस्वरूप यस्तो निर्णय लिएको हो।

बुधबार ट्रम्पले चीनबाट अमेरिका आयात हुने सम्पूर्ण वस्तुहरूमा थप ३४% महसुल लगाउने घोषणा गरेका थिए, जसले विश्वका दुई ठूला अर्थतन्त्रबीचको सम्बन्धमा ठूलो परिवर्तन ल्याउने र व्यापार तनाव अझ चर्काउने संकेत दिएको छ।

“अमेरिकाको यो अभ्यास अन्तर्राष्ट्रिय व्यापार नियमहरूअनुसार छैन, यसले गम्भीर रूपमा चीनको वैध अधिकार र हितहरूमा क्षति पुर्‍याउँछ, र यो एक प्रकारको एकपक्षीय दबाबको अभ्यास हो,” चीनको स्टेट काउन्सिल ट्यारिफ कमिशनले प्रतिशोधात्मक महसुल घोषणा गर्दै भनेको छ।

सत्तामा फर्किएपछि जनवरीदेखि ट्रम्पले चीनबाट आयात हुने सम्पूर्ण वस्तुहरूमा दुईपटक गरी १०% अतिरिक्त महसुल लगाइसकेका छन्। ह्वाइट हाउसले यो कदम चीनबाट अमेरिका आउने अवैध फेन्टानिलको आपूर्ति रोक्न आवश्यक रहेको बताएको थियो। यसको अर्थ, अब चीनबाट अमेरिका आइपुग्ने वस्तुहरूमा कुल ५४% महसुल लाग्नेछ।