इरानद्वारा अमेरिकी हवाई अड्डाहरूमा आक्रमण: कतार, बहराइन र कुवेतमा मिसाइल खसे, वाशिंगटनमा हलचल

दोहा । इरानले अमेरिकाविरुद्ध प्रतिकारात्मक आक्रमण सुरु गरेको छ। कतार, बहराइन, कुवेत र इराकमा रहेका अमेरिकी सैन्य अड्डाहरूमा इरानी मिसाइलहरू खसेका छन्। कतारको राजधानी दोहामा पनि विस्फोटको आवाज सुनिएको छ। 

यी विस्फोटहरू त्यतिबेला भए, जब कतारमा अमेरिकी सैन्य अड्डाहरूमा इरानको प्रतिकारात्मक आक्रमणको अनुमान गरिएको थियो। यसैबीच, कतारले आफ्नो हवाई क्षेत्र पहिल्यै बन्द गरिसकेको छ। 

अमेरिकी दूतावासले आफ्ना सबै नागरिकलाई अर्को सूचना नआउदासम्म सुरक्षित स्थानमा बस्न निर्देशन दिएको छ।

अमेरिकालाई पहिल्यै आक्रमणको संकेत थियो !

एक्सियोसले एक इज्रायली अधिकारीको हवाला दिँदै बताएअनुसार, इरानले कतारमा रहेका अमेरिकी सैन्य अड्डाहरूलाई निशाना बनाएर छ मिसाइल प्रहार गरेको छ।।। आउटलेटले पहिले नै संकेत गरेको थियो कि तेहरान यस्तो आक्रमणको तयारीमा थियो। अमेरिकी अधिकारीहरूले इरानले अमेरिकी सेनामाथि सम्भावित आक्रमणका लागि मिसाइल लन्चरहरू तैनाथ गरेको बताएका थिए। अमेरिकी अधिकारीहरूलाई शंका थियो कि तीन परमाणु स्थलमा अमेरिकी आकाशणको जवाफमा इरानले मध्यपूर्वमा रहेका अमेरिकी सेनामाथि सम्भावित आक्रमणका लागि मिसाइल लन्चर तैनाथ गरिरहेको छ।

भारतले पनि अलर्ट जारी गर्यो

भारतले मध्यपूर्वको पछिल्लो अवस्थालाई मध्यनजर गर्दै एडभाइजरी जारी गरेको छ। एडभाइजरीमा भनिएको छ, "वर्तमान अवस्थालाई ध्यानमा राख्दै, कतारमा रहेका भारतीय समुदायलाई सतर्क रहन र घरभित्रै बस्न अनुरोध गरिएको छ। कृपया शान्त रहनुहोस् र कतारी अधिकारीहरूले प्रदान गरेका स्थानीय समाचार, निर्देशन र मार्गदर्शनको पालना गर्नुहोस्।" दूतावासले आफ्ना सामाजिक सञ्जाल च्यानलहरू मार्फत पनि अपडेट प्रदान गरिरहनेछ।

यूएईले पनि हवाई क्षेत्र बन्द गर्यो

कतारपछि संयुक्त अरब अमीरात (यूएई) ले पनि आफ्नो हवाई क्षेत्र बन्द गरेको छ। फ्लाइटराडारले एक्समा पोस्ट गर्दै उडान मार्गहरू र हवाई ट्राफिक नियन्त्रण अडियोको आधारमा यूएईको हवाई क्षेत्र बन्द गरिएको जनाएको छ। यो कदम इरानले कतार र इराकमा रहेका अमेरिकी सैन्य अड्डाहरूमा अमेरिकाविरुद्ध प्रतिकारात्मक हवाई आक्रमण सुरु गरेपछि तुरुन्तै चालिएको हो।

इरानले अभियानलाई दियो यो नाम

इरानको तस्निम समाचार एजेन्सीले इराक र कतारमा रहेका अमेरिकी अड्डाहरूलाई निशाना बनाएर 'विजयको घोषणा' (Annunciation of Victory) नामक मिसाइल अभियान सुरु गरेको जनाएको छ।

इराकको अल-असद हवाई अड्डामा उच्च सतर्कता

सैन्य स्रोतहरूले इराकको अल-असद हवाई अड्डामा सैनिकहरूलाई बढ्दो तनावका बीच बंकरमा शरण लिन निर्देशन दिइएको बताएका छन्। अमेरिकी सैन्य अड्डा हाल अधिकतम सतर्कताको अवस्थामा छ। आक्रमणको चिन्ताका कारण इराकको अल-असद हवाई अड्डामा हवाई रक्षा प्रणाली सक्रिय गरिएको छ।