नेपालमा पश्चिमी वायुको प्रभावले बुधबार अधिकांश भू-भागमा वर्षाको सम्भावना

काठमाण्डौं । देशभरको मौसममा अस्थिरता देखिँदै गएको छ ।  

जल तथा मौसम विज्ञान विभागअन्तर्गतको मौसम पूर्वानुमान महाशाखाले आगामी केही दिन अधिकांश क्षेत्रमा बदली भई मेघगर्जन र चट्याङ्गसहित वर्षा हुने सम्भावना रहेको जनाएको छ ।

महाशाखाका अनुसार बुधबार कोशी, मधेश, बागमती, गण्डकी र लुम्बिनी प्रदेशका केही भूभागमा मध्यम वर्षा हुन सक्नेछ भने अन्य प्रदेशका सीमित स्थानमा पनि पानी पर्ने आँकलन गरिएको छ ।  

उच्च हिमाली क्षेत्रमा हल्का हिमपात हुने सम्भावना रहेको छ । 

हाल पश्चिमी वायु, स्थानीय वायु र पूर्वी क्षेत्रमा विकसित न्यून चापीय प्रणालीको प्रभावका कारण मौसम प्रभावित भएको जनाइएको छ ।

आज राति विशेषगरी कोशी र मधेश प्रदेशका केही स्थानमा मेघगर्जनसहित वर्षा हुने देखिएको छ भने बागमती र गण्डकीका हिमाली क्षेत्रमा पनि यस्तै अवस्था रहने अनुमान छ ।  

 

देशका अन्य भागमा छिटफुट वर्षा र उच्च हिमाली क्षेत्रमा हिमपात हुन सक्ने महाशाखाले जनाएको छ ।

बिहीबारतर्फ मौसममा आंशिक सुधार देखिने भएपनि पहाडी र हिमाली भूभागमा बादल लागिरहनेछ ।  

सुदूरपश्चिम, कर्णाली, लुम्बिनीसहित विभिन्न प्रदेशका पहाडी तथा हिमाली क्षेत्रमा अझै मेघगर्जन र चट्याङ्गसहित वर्षाको सम्भावना कायमै रहने महाशाखाको पूर्वानुमान छ ।