दाङमा नबिलको जलन उपचार शिविर : २५ जनाको शल्यक्रिया, ८५ बिरामी लाभान्वित

काठमाण्डौ । दाङको घोराहीस्थित राप्ती स्वास्थ्य विज्ञान प्रतिष्ठानमा सञ्चालन गरिएको नबिल नि:शुल्क जलन उपचार शिविरबाट ८५ जना बिरामीले उपचार तथा विशेषज्ञ परामर्श सेवा प्राप्त गरेका छन्। नबिल बैंक लिमिटेड र राप्ती स्वास्थ्य विज्ञान प्रतिष्ठानको संयुक्त आयोजना तथा Sushma Koirala Memorial Hospital को सहकार्यमा वैशाख २५ देखि २८ गतेसम्म शिविर सञ्चालन गरिएको हो।

शिविर अवधिमा २५ जना जलनपीडितको सफल शल्यक्रिया गरिएको नबिल बैंकले जनाएको छ। तीमध्ये जटिल अवस्थाका १२ जना बिरामीलाई थप उपचारका लागि काठमाडौंको साँखुस्थित सुष्मा कोइराला मेमोरियल अस्पतालमा रिफर गरिएको छ।

नबिल बैंकले संस्थागत सामाजिक उत्तरदायित्व (CSR) अन्तर्गत विशेषज्ञ चिकित्सकको टोलीमार्फत देशका दुर्गम क्षेत्रमा रहेका जलनपीडितलाई नि:शुल्क उपचार र परामर्श सेवा उपलब्ध गराउँदै आएको छ। जलनका बिरामीलाई तत्काल र विशेष उपचार आवश्यक पर्ने भए पनि धेरै जिल्लामा पर्याप्त सुविधा नहुँदा उनीहरू गुणस्तरीय स्वास्थ्य सेवाबाट वञ्चित हुने गरेका छन्। यस्तै समस्यालाई लक्षित गर्दै शिविर आयोजना गरिएको बैंकले जनाएको छ।

नबिल बैंकका प्रमुख कार्यकारी अधिकृत (सिइओ) Manoj Kumar Gyawali ले नेपालमा अझै पनि धेरै जलनपीडित उपचारको पहुँचबाट टाढा रहेको उल्लेख गर्दै बैंकले सामाजिक उत्तरदायित्वअन्तर्गत दुर्गम क्षेत्रका बिरामीलाई लक्षित गरी यस्तो अभियान सञ्चालन गरेको बताए।

उनका अनुसार बैंकले हालसम्म चार वटा प्रदेशमा सञ्चालन गरेका जलन उपचार शिविरमार्फत आर्थिक अभावका कारण उपचारको प्रतीक्षामा रहेका करिब ५ सय बिरामीले नि:शुल्क सेवा लिइसकेका छन्।

राप्ती स्वास्थ्य विज्ञान प्रतिष्ठानका निमित्त निर्देशक तथा सहप्राध्यापक Dr. Suresh Rasaili ले प्रतिष्ठानमा जलनसम्बन्धी विशिष्ट सेवा उपलब्ध नभएको अवस्थामा शिविर निकै प्रभावकारी बनेको बताए। “यस प्रकारको सेवा नभएको क्षेत्रमा २५ वटा शल्यक्रिया हुनु अत्यन्त कल्याणकारी काम हो,” उनले भने, “जलनपीडितको पीडा कम गर्न खटिनुभएका स्वास्थ्यकर्मी र आर्थिक सहयोग गर्ने नबिल बैंकप्रति आभार व्यक्त गर्न चाहन्छु।”

नबिल बैंकले यसअघि मधेश, कर्णाली र सुदूरपश्चिम प्रदेशमा पनि यस्तै शिविर सञ्चालन गरिसकेको छ। बैंकका अनुसार मधेश प्रदेशमा आयोजित चारदिने शिविरबाट १५० जना, सुदूरपश्चिमको धनगढीमा ६५ जना तथा कर्णाली प्रदेशको सुर्खेतमा सञ्चालन गरिएको शिविरबाट १९४ जनाले उपचार तथा परामर्श सेवा लिएका थिए।

नेपालका अग्रणी वाणिज्य बैंकमध्ये एक Nabil Bank ले सामाजिक उत्तरदायित्वअन्तर्गत स्वास्थ्य, सामाजिक उद्यमशीलता, विकास तथा रोजगारी सिर्जनासम्बन्धी विभिन्न कार्यक्रम सञ्चालन गर्दै आएको जनाएको छ।