वैदेशिक रोजगार ठगी आरोपमा काभ्रे र पर्वतका दुई व्यक्ति नियन्त्रणमा

काठमाण्डौ । वैदेशिक रोजगारीका लागि ग्रिस र युएई पठाइदिने भन्दै २६ लाख रुपैयाँ ठगी गरेको आरोपमा प्रहरीले दुई जनालाई पक्राउ गरेको छ ।

पक्राउ पर्नेमा काभ्रेपलाञ्चोक भुल्लु नगरपालिका–१ का ५२ वर्षीय मधुसुदन पराजुली र पर्वत कुस्मा नगरपालिका–२ का ३२ वर्षीय प्रकाश बाँस्तोला रहेका छन् । 

उनीहरूलाई काठमाडौं उपत्यका अपराध अनुसन्धान कार्यालय टेकुले विभिन्न स्थानबाट नियन्त्रणमा लिएको हो ।

कार्यालयका प्रवक्ता एवं प्रहरी उपरीक्षक रामेश्वर कार्कीका अनुसार मधुसुदन पराजुलीले ग्रिस पठाइदिने भन्दै २३ लाख रुपैयाँ लिएका थिए भने प्रकाश बाँस्तोलाले युएई पठाउने भन्दै तीन लाख रुपैयाँ लिएर पीडितलाई विदेश नपठाई सम्पर्कविहीन भएका थिए ।

पीडितहरूको उजुरीका आधारमा अनुसन्धान अघि बढाउँदै उनीहरूलाई पक्राउ गरिएको प्रहरीले जनाएको छ ।  

पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग ताहाचल पठाइएको छ ।

 

प्रहरीले पछिल्लो समय वैदेशिक रोजगारीका नाममा ठगीका घटना बढ्दै गएको भन्दै सर्वसाधारणलाई सचेत रहन आग्रह गरेको छ ।  

आकर्षक तलब र छिटो विदेश पठाइदिने प्रलोभनमा नपरी सरकारी मान्यता प्राप्त वैदेशिक रोजगार प्रक्रिया मात्र अपनाउन प्रहरीले सुझाव दिएको छ ।

साथै, कुनै व्यक्ति वा संस्थाबाट ठगी भएको आशंका भए तत्काल प्रहरी वा सम्बन्धित निकायमा उजुरी दिन पनि आग्रह गरिएको छ ।