एकैपटक ८ वटा कम्पनीको लाखौं कित्ता सेयर किन बेच्दैछ एनआरएन इन्फ्रास्टक्चर ?

काठमाण्डौ । एनआरएन इन्फ्रास्ट्रक्चर एण्ड डेभलपमेन्ट लिमिटेडले नेपाल धितोपत्र बोर्डको निर्देशन पालना गर्दै एकैपटक ८ वटा सूचीकृत कम्पनीहरूको संस्थापक तथा साधारण सेयर बजारमा बिक्री गर्ने भएको छ।

गत असार महिनामा सेबोनले सार्वजनिक निष्कासन गर्ने लगानी कम्पनीहरूलाई तोकिएका क्षेत्र (ऊर्जा, यातायात, सञ्चार, कृषि, पर्यटन, उत्पादन तथा प्रशोधन, सूचना प्रविधि र खनिज उत्खनन) बाहेकका कम्पनीहरूको सेयर किन्न पूर्ण रूपमा रोक लगाएको थियो। यही नियमको कारण कम्पनीले आफूसँग रहेका तोकिएका क्षेत्रबाहेकका कम्पनीहरूको सेयर बिक्री गर्नुपरेको हो।

बिक्रीमा राखिएका सेयरहरू यस प्रकार छन्:

1.कुमारी बैंक लिमिटेड – ५ लाख ३० हजार कित्ता संस्थापक सेयर

2.नेशनल माइक्रोफाइनान्स लघुवित्त – १ लाख ७ हजार ४८४ कित्ता संस्थापक सेयर

3.नेरुडे मिर्मिरे लघुवित्त – ७४ हजार १०६ कित्ता संस्थापक सेयर

4.मेरो माइक्रोफाइनान्स लघुवित्त – ७८ हजार २०९ कित्ता संस्थापक + २ लाख ८२ हजार ३१५ कित्ता साधारण सेयर

5. हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कम्पनी – ४० हजार १ कित्ता संस्थापक सेयर

6. प्रभु महालक्ष्मी लाइफ इन्स्योरेन्स – ५ लाख ९४ हजार कित्ता संस्थापक सेयर

7. नेशनल फण्ड म्यानेजमेन्ट लिमिटेड – २ लाख २५ हजार कित्ता सेयर

8. नेशनल लाइफ इन्स्योरेन्स कम्पनी – १ कित्ता साधारण सेयर

कम्पनीका अनुसार यी सबै सेयर बिक्री गर्ने निर्णय गत ३ मंसिरमा बसेको सञ्चालक समितिको बैठकले गरेको हो। सेबोनको असारको निर्देशन कार्यान्वयन गर्नका लागि यो कदम चालिएको कम्पनीले जनाएको छ।

सेयर बिक्री प्रक्रिया चाँडै नै सुरु हुने अपेक्षा गरिएको छ।