ट्रम्पको ट्यारिफ नीतिपछि अमेरिकी सेयर बजारमा भारी गिरावट, अरबपतिहरूको सम्पत्तिमा ५० अर्ब डलरले गिरावट

काठमाण्डौ ।  अमेरिका राष्ट्रपति डोनाल्ड ट्रंपको ट्यारिफ (शुल्क) नीतिका कारण शुक्रबार अमेरिकी सेयर बजारमा ठुलो गिरावट आएको छ। यो मे महिनापछिको एकै दिनको सबैभन्दा ठूलो गिरावट भएको बताइएको छ। सेयर बजारमा आएको गिरावटका कारण विश्वका ठूला धनीहरूमध्ये नौ अमेरिकी अरबपतिहरूको सम्पत्तिमा करिब ५० अर्ब अमेरिकी डलरको गिरावट आएको छ।

सबैभन्दा ठूलो घाटा अमेजनका संस्थापक जेफ बेजोसले बेहोरेका छन्। कम्पनीको सेयरमा आएको गिरावटका कारण उनको कुल सम्पत्ति १७.२ अर्ब डलर घटेर हाल २३७ अर्ब डलरमा सीमित भएको छ। अहिले उनी विश्वको चौथो धनी व्यक्तिको स्थानमा छन्।

एलन मस्कको पनि ठूलो घाटा

टेस्ला र स्पेसएक्सका प्रमुख तथा विश्वकै सबैभन्दा धनी व्यक्ति एलन मस्कको सम्पत्तिमा मात्र शुक्रबार ४.०३ अर्ब डलरको गिरावट आएको छ। यो वर्ष मात्रै उनको नेटवर्थ ८०.५ अर्ब डलरले घटेको छ। तर पनि उनी ३५२ अर्ब डलरसहित धनीको सूचीमा पहिलो नम्बरमा कायम छन्।

ओरेकलका संस्थापक लैरी एलिसनको सम्पत्ति पनि ९.९४ अर्ब डलरले घटेको छ। उनी हाल २९५ अर्ब डलरसहित दोस्रो स्थानमा छन्। तर २०२५ सालमा अहिलेसम्म सबैभन्दा धेरै १०२ अर्ब डलरले सम्पत्ति बढाउने अरबपति पनि उनी नै हुन्।

जकरबर्गदेखि गेट्ससम्मको सम्पत्ति घट्यो

फेसबुकका मालिक मार्क जकरबर्गको सम्पत्ति ८.०८ अर्ब डलरले घटेर २६३ अर्ब डलरमा झरेको छ।

स्टीव बालमरको ३.०२ अर्ब, लैरी पेजको २.३१ अर्ब, सर्गेई ब्रिनको अर्बौं, एनभिडियाका जेनसन हुआंगको ३.६ अर्ब, र वारेन बफेटको ८९.६ करोड डलर गुमेको छ।

माइकल डेलले २.७२ अर्ब र बिल गेट्सले १.०९ अर्ब डलर गुमाएका छन्।

अम्बानीको सम्पत्ति बढ्यो, अडानीको घट्यो

एशियाका सबैभन्दा धनी व्यक्ति मुकेश अम्बानीको सम्पत्तिमा भने शुक्रबार ३०६ मिलियन डलरले वृद्धि भएको छ। अहिले उनको कुल सम्पत्ति १०० अर्ब डलर पुगेको छ र उनी विश्व धनीको सूचीमा १७औं स्थानमा छन्। यो वर्ष मात्रै अंबानीको सम्पत्ति ९.५६ अर्ब डलरले बढेको छ।

तर गौतम अडानीको सम्पत्तिमा शुक्रबार मात्र २.१४ अर्ब डलरको गिरावट आएको छ। हाल उनको कुल सम्पत्ति ७६.५ अर्ब डलर रहेको छ। अडानी विश्व धनीहरूको सूचीमा अहिले २१औं स्थानमा छन्।

अमेरिकी राष्ट्रपति ट्रंपको ट्यारिफ नीतिले बजारमा व्यापक असर पारेको देखिएको छ। लगानीकर्ताको मनोबल कमजोर बनेसँगै, विश्वका शीर्ष धनाढ्यहरूको सम्पत्ति एकै दिनमा अर्बौं डलरले खुम्चिएको हो। अबको बजार प्रवृत्तिले यी धनीहरूको स्थान फेरिने वा थप गिरावट आउन सक्ने अनुमान विश्लेषकहरूले गरेका छन्।